06.08.2015  Штипскиот прволигаш “Брегалница“ нема да може да го користи стадионот “Никола Мантов“ во Кочани како домашен терен во првото коло од новото првенство.

Главна причина за тоа е што не биле отстранети недостатоците на објектот што биле претходно констатирани, а што битно влијаат за нормално одржување на спортски натпревари од ранг на првата лига.

Во вторникот двајца претставници од ФФМ дошле во ненајавена посета на стадионот во Кочани за да направата контрола дали тој ги исполнува условите пред почетокот на првенството закажано за претстојниот викенд.

Забелешки биле упатени што теренот имал нерамнини, а местата каде што недостасувала трева биле исполнети со песок. Исто така, и стативите на головите не биле свежо обоени.

Негативни оценки имало и за пасивната безбедност на стадионот затоа што вратите за евакуација на гледачите на западната трибина не биле обоени во жолто, а на источната трибина не била поставена заштитна ограда, ниту пак имало посебни скали за евакуација.

Недостатоци се регистрирани и во подтрибинскиот дел, каде се наоѓаат соблекувалните и службените простории. Во ходникот и во самите соблекувални не биле поставени керамички плочки, а немало ниту поединечни шкафови за секој од играчите. При контролата претставниците од ФФМ утврдиле и дека не се заменети и санитарните уреди и опрема во соблекувалните.

Сите овие забелешки ги навеле одговорните во Федерацијата да го одложат одигрувањето на првото коло, што штипска “Брегалница“ како домаќин требаше да го има во Кочани против екипата на “Работнички“ од Скопје.

Управниот одбор и луѓето од ФК “Осогово“, на кои им е даден на користење стадионот “Никола Мантов“, имаат рок до третото коло од првенството во првата македонска фудбалска лига, односно до крајот на август да ги отстранат сите недостатоци. Во спротивно и дефинитивно ќе биде донесена одлука штипјани наместо во Кочани во текот на целото првенство да бидат домаќини на друг терен.

Т. Ајтовски