17.05.2017 По повод Месецот на безбедноста на велосипедистите во сообраќајот, Полициската станица - Кочани од денеска започна со спроведување акција за подигнување на свеста кај учесниците во сообраќајот кои што возат велосипед за нивна заштита и поголема безбедност.

Во соработка со Ротари клубот Кочани - Виница службени лица од Полицијата на неколку локации во градот на велосипедистите учесници во сообраќајот им делеа флаери со наслов „Возач сум треба да знам“, како и флуоросцентни елеци кои што велосипедистите потребно е да ги носат, особено навечер заради поголема видливост на патот и со тоа поголема заштита.

- На иницијатива на Полициската станица - Кочани ние како Ротари клуб Кочани – Виница дадовме поддршка на оваа акција чија цел е подигнување на свеста кај велосипедистите за поголема безбедност во сообраќајот, но и за поголема промоција на велосипедот како превозно средство. И понатаму ќе ги поддржуваме сите акции на полицијата и на другите институции, рече Венко Лазаров, член на Ротари клуб Кочани – Виница.

Акцијата е дел од програмата за работа на Општинскиот совет за безбедност во патниот сообраќај на Кочани, а истата ќе трае до крајот на месец мај.

Т. Велкова

©2017 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.