01.04.2019  Во пожарот што ги зафати падините на Осоговските Планини кај кочанското село Цера до сега изгореа над 50 хектари со букова и борова шума.

Пожарникарите од Територијалната противпожарна единица од Кочани трет ден се на терен, но немоќни се во локализирањето на пожарот поради непристапноста на теренот, а силниот ветер и сувата вегетација дополнително помагаат огнот брзо да се шири.

Командирот на ТППЕ, Благој Паунов истакна дека интервенирале повеќе од 48 часа и ги ангажирале сите пожарникари и опремата со која располагаат.

Во моментот на подготвувањето на Вестите сè уште активно беше уште едно жариште, но се надеваат дека до попладне и тоа ќе биде изгаснато. Во саботата се појавил мал пожар што со брза интервенција го запреле, но следното утро се појавил нов, на локација недостапна за противпожарните возила. Според првичните индиции причина за пожарот е човечкиот фактор. 

Пртетходната ноќ заседаваше општинскиот Кризен штаб со претставници на Дирекцијата за заштита и спасување, Центарот за управување со кризи, Територијалната противпожарна единица – Кочани, Полициската станица,  КЈП „Водовод“, Шумското стопанство „Осогово“ и од Локалната самоуправа, при што е изготвен план за дејствување во текот на денешниот ден.  Целта е  со добра координација и комуникација брзо да се  реагира и да се превенира натамошното ширење на пожарите.

Во моментот на терен дежурни се екипи составени од пожарникари, инспектори, полицајци  и претставници на Шумското стопанство и на Општина Кочани.  

Т. Ајтовски