05.12.2018 Управниот одбор на комуналното претпријатие „Водовод“ од Кочани донесе одлука со која на сите корисници на услугите кои имаат заостанати сметки за потрошена вода им се одобрува да го платат долгот без пресметаната камата за задоцнето плаќање.
Според одлуката, оваа можност не важи за органите на државната и локалната власт, како и за другите државни органи основани согласно со Уставот и со закон.
Во ослободувањето не се вклучени и институциите кои вршат дејности од јавен интерес утврден со закон, а се организирани како агенции, фондови, јавни установи и јавни претпријатија основани од Република Македонија, како и за Општина Кочани.
04.12.2018 Вработените на итната медицинска помош во Здравствениот дом во Виница ќе работат со нов ЕКГ апарат - донација од Ротари клубот Кочани - Виница.
За реализација на оваа донација, Ротари клубот организираше претстава, а средствата од неа беа за подобрување на здравствените услуги во виничката амбуланта.
- Една од целите на Ротари клубот Кочани - Виница е соработка и помагање во здравството. За таа цел организиравме хуманитарна претстава на која ни гостуваше театарот од Штип со претставата „Умри машки“.
04.12.2018 Македонскиот гудачки квартет „Вива стрингс“ имаше концертен настап во Кочани, во рамки на програмата „Нов културен бран“, при што се претстави со обработки на популарни рок, соул, фанк, рап и џез теми.
Публиката имаше можност да проследи класични пребработки на хитови од АББА, Мајкл Џексон, Стинг, Квин, Ренди Крафорд и Ерик Клептон.
Квартетот во Кочани има настапувано и претходно, а последниот концерт наиде на одлична прифатеност кај публиката.
29.11.2018 Општина Кочани е домаќин на дводневна меѓународна работилница за јакнење на институционалните капацитети во конвенционалното и органското производство на ориз, што се реализира со поддршка од инструментот за техничка помош и размена на информации (TAIEX) на Европската комисија и од Министерството за земјоделство, шумарство и водостопанство на Македонија.
Целта на работилницата е домашните производители и стручни лица да разменат европски искуства и знаења во органското производство на ориз со предавачи-експерти од Италија, Грција и Бугарија, како и да разговараат за унапредување на здружувањето и соработката меѓу земјоделците.
29.11.2018 Локалната самоуправа на Кочани спроведува дводневна акција за дератизација на канализациската мрежа за што се набавени 250 килограми кумарински препарат за труење на глодарите.
Стручни екипи од Центарот за јавно здравје, со поддршка на технички персонал од комуналното претпријатие “Водовод“ ги поставуваат кумаринските мамци во канализациските шахти во градот и во селата Мојанци, Горни и Долни Подлог, Грдовци, Тркање, Прибачево и Оризари.
Дел од мамците ќе бидат распоредени и на градската депонија, каде исто така е регистрирана појава на глодари и други штетници кои се преносители на заразни болести.
29.11.2018 Виница ќе добие ново комунално возило за транспорт на отпадот. Одлуката за финансиска поддршка беше усвоена на редовната седница на Советот на Општината.
Во рамките на проектот „Унапредување на општинското владеење“, со што ќе обезбедат средства во висина од 26.000 евра како грант во рамки на Програмата за развој на ОН. Советот одобри дополнително кофинансирање во висина од 306.000 денари преку општинскиот буџет.
- Ние како општина аплициравме со три проекти, при што од страна на УНДП беше одобрен еден од проектите, а тоа е купување на возило за смет, мало возило што ќе се користи за потесните улици и сокаци во нашата општина.
28.11.2018 Петмина каратисти од КК “Партизан“ и еден од карате клубот “Кочани“ ќе ја претставуваат Македонија на Балканското првенство што од 30 ноември до 2 декември ќе се одржи во Република Хрватска.
Тоа е одлично признание за нивните досегашни успеси на домашните натпреварувања, како и за освоените медали на изборното првнество за кадети, јуниори и младинци до 21-годишна возраст.
Виза за учество на ова балканското младинско првенство обезбедија Ѓорги Петров, Мартина Шахинова, Роберто Здравковски, Ангел Стојанов и Кристијан Грозданов од КК „Партизан“, како и Љубомир Давитков од КК “Кочани“.
28.11.2018 Општина Кочани ја организираше третата јавна расправа со граѓаните на која се разгледуваат прашања од јавен интерес, а за чие решавање треба да се предвидат општински буџетски средства за наредниот едногодишен период.
Целта на локалната власт е да обезбеди поголема транспарентност и вклученост на граѓаните во креирањето на Буџетот за идната година.
Пред почетокот на јавната расправа, што се одржа во салата на Советот, беше презентиран нацрт-буџетот и планираните инфраструктурни проекти за 2019 година.
28.11.2018 Музејот „Теракота“ со поддршка од Локалната самоуправа на Виница го реализираше овогодишниот проект „Еднаквоста во фокусот“ чија цел е поголема вклученост и едуцирање на лицата со посебни потреби.
Во рамки на одбележувањето на Меѓународниот ден на лицата со посебни потреби, во ОУ „Гоце Делчев“ се одржа завршна свеченост на која беа претставени реализираните активности од проектот, а во што беше вклучен и Дневниот центар од Виница.
Во рамки на проектот се организираа повеќе работилници и посети на културни и археолошки знаменитости во општината и регионот, како и други содржини.
27.11.2018 Во предвидениот рок од околу еден месец заврши реконструкцијата и преасфалтирањето на делницата долга 11 километри на регионалниот пат од Кочани кон туристичко-рекреативниот центар Пониква на Осоговските Планини.
За реализација на градежните работи Министерството за транспорт и врски инвестираше над 102 милиони денари, при што освен нов асфалтен слој на коловозот со широчина од шест метри, се работеше и на поправка на заштитната ограда и на пропустите за атмосферската вода.
