25.10.2018 На денешен ден точно пред една година градоначалникот на Кочани, Николчо Илијев ја презеде функцијата.
На локалните избори во октомври минатата година, на кои оствари предност од 3.700 гласови во однос на противкандидатот Ратко Димитровски, Илијев оствари победа уште во првиот круг, по што следуваа правно-формалните и законски рокови пред да седне во градоначалничката фотелја.
Една година подоцна, осврнувајќи се на активностите што ги реализираше, во гостувањето на програмата на Канал 8 тој ја потенцираше наследената лоша финансиска состојба и задолженоста на Општината, што бил еден од најголемите предизвици на стартот на неговиот мандат.
25.10.2018 Единаесеттте општини од Источниот плански регион започнаа постапка за ликвидација на меѓуопштинското јавно претпријатие за управување со отпад „Депонија Исток“ со седиште во Штип.
На седницата на Комисијата за комунални работи при Советот на Општина Кочани беше речено дека причина за ликвидацијата на претпријатието е менувањето на пристапот за решавање на прибирањето, транспортот и одлагањето на комуналниот отпад.
Во иднина тоа треба да добие поширок, меѓурегионален опфат.
24.10.2018 Прво место освоија членовите на здружението „Мобилност“ од Кочани на дваесет и четвртото издание на републичкиот квиз натпревар на лицата со телесен инвалидитет на Македонија.
Во организација на Националниот сојуз на лица со телесен инвалидитет на Македонија - „Мобилност“ натпреварот се одржа во село Банско, Струмица.
Во конкуренција од 16 екипи од здруженијата членки на сојузот а по исклучително интересна борба и презентација на знаења од повеќе области првото место го освои екипата на кочанското здружение а кое беше победник и во претходните две години во истиот квиз натпревар.
24.10.2018 На 21. јубилејна манифестација „Тортијада“, што во организација на здружението „Мобилност“ од Струмица, а финансиски поддржана од „Мобилност“ Македонија жените членови на здружението на телесни инвалиди од Кочани го освоија второто место со тортата „Горда мајка“.
Во силна кокуренција со учество на 15 здруженија на телесни инвалиди од Македонија кочанските жени Тања Миладинова и Здравка Данева од „Мобилност“ Кочани го освоија второто место.
Тања Миладинова и Здравка Данева додадоа дека овој пат сакаат да ја покажат својата хуманост и затоа средствата што ги добија од наградата за второ место на „Тортијадата“ ќе бидат донирани во хуманитарни цели за помош на Андреј Стојанов од Кочани кој боледува од церебрална парализа и му се потребни средства да замине повторно на третман со матични клетки во Русија.
22.10.2018 Со свечена програма во Трговскиот центар, компанијата “Амфенол Технолоџи Македонија“ одбележа значаен јубилеј - 5 години постоење.
Во неделата “Амфенол“ имаше целодневна програма за граѓаните од сите возрасти. Почнувајќи со игри за најмладите, забавна програма со ди-џеј Ацко, настап на музичкиот бенд “Кирилична поддршка“ и познатиот Влатко Лозановски, како и со официјален дел на доделување благодарници и најгради на најдобрите и најлојалните работници „Амфенол Технолоџи Македонија“ го одбележа својот 5-ти роденден.
16.10.2018 Учениците од СОУ „Љупчо Сантов“ и СОУ „Методи Митевски - Брицо“ од Делчево и со професорите по географија Ирина Тодорова и Сребрен Ѓорѓиевски, во заедничка соработка и реализирање часови на тема „Синоптиката како дејност во служба на луѓето“ со посета на метеоролошката станица во Виница.
Од таму се вратија и реализираа час во кочанската гимназија.
-На заедничката активност беа објаснети сите метеоролошки елементи. Се вративме тука, во нашата гимназија, и им посакавме добредојде на гостите со еден отворен час за метеоролошките елементи.
15.10.2018 Екипа од 20 ученици и 5 професори од СОУ „Љупчо Сантов“ викендов беа дел од едукативната работилница во село Негрево, Пехчевско во новоотворениот едукативен центар за зачувување на природата.
Истиот е отворен со финансиска поддршка од Швајцарска агенција за развој и соработка преку проектот за зачувување на природата.
- Кустосот Верица Арнаутовска таму не информираше за целта на постоење на едукативниот центар и меѓу другото промовираше дека целиот тој регион спаѓа во групата на заштитени подрачја од причини што таму е најдено едно инсективорно растение кое што се храни со инсекти кое што е ендемски вид и не се среќава на друго место.
15.10.2018 Ликовна работилница на тема „Витраж“ се одржа во ОУ „Св. Кирил и Методиј“ под менторство на ликовниот уметник Владимир Темков.
Целта на ваквите работилници е преку директните контакти и средби со врвните ликовни уметници учениците да ја научат сликарската техниката „витраж“ но и да се развие и зголеми љубовта и интересот кон сликањето и уметноста.
Активноста е дел од проектот „Сонцето е ѕвезда“ чија цел е витражот како техника да ја приближи до учениците.
03.10.2018 Механизација и работници на градежната компанија “ВЕ-група“ од Радовиш го завршија асфалтирањето на една од централните улици во селото Јакимово, со што Општина Виница ја продолжува реализацијата на проектот за изградба и комплетирање на 12 улици во градот и во населените места.
Градежните работи на сообраќајницата во Јакимово чиеа над 500 илјади денари, а со нејзиното завршување се решава важно инфраструктурно прашање, со оглед што таа е и дел од локалниот пат кон селото Истибања.
Од Локалната самоуправа се задоволни што навреме е реализиран планот за асфалтирање и најавуваат дека проектот продолжува во другите населени места во општината.
12.10.2018 Започнаа градежните работи за реконструкција и преасфалтирање на патниот правец од Кочани кон туристичко-рекреативниот центар Пониква на Осоговските Планини, за што државата вложува близу 102 милиони денари.
Министерот за транспорт и врски, Горан Сугарески, кој заедно со директорот на Јавното претпријатие за државни патишта, Зоран Китанов и градоначалникот на Кочани, Николчо Илијев го посети градилиштето, рече дека во овој регион се започнати крупни инвестиции во патната инфраструктура.
