Жителите на Кочани и на селото Бели кои од почетокот на оваа недела го блокираат патот кон комуналната депонија за возилата што го транспортираат отпадот, ќе дозволат до понеделник камионите на КЈП „Водовод“ да го депонираат отпадот на депонијата.
Таков заклучок беше донесен вечерва по средбата со општинското раководство, кое дојде на крстосницата кон Бели каде што е блокадата, за да ги соопшти заклучоците од состанокот на Кризниот штаб и Општинскиот совет за превенција, кои одржаа состанок попладнево.
В понеделник попладне градоначалникот Папазов ќе има средба со претставници од Министерството за животна средина, а граѓаните бараат отповикување на одлуката со која отпадот од другите општини се носи во Кочани.
-Сите ние што учествуваме на протестот одлучивме да дадеме на шанса на комуналното претпријатие „Водовод“ во следните 48 часа, од овој момент, да го собере ѓубрето насекаде од градот и околината, каде што има обврска тоа да го направи. Протестот не прекинува, продолжуваме под силен мониторинг на истото тоа третирање и носењето до депонијата. Ќе ја чекаме одлуката на Влада во понеделник. Нашата црвена линија неколку пати сме ја повториле – соседните општини да не го депонираат нивниот смет во нашата градска депонија, ние си имаме градска депонија која не сакаме да стане регионална затоа што сите сме свесни што се преживеавме во последните две години откако со одлука на Владата решиле да ни ја претворат во регионална депонија. Протестот продолжува, истакна Благица Сабовљевиќ Стоименова, учесничка на блокадата.
Претходно, на итниот состанок што градоначалникот Љупчо Папазов го свика со членовите на Општинскиот кризен штаб за заштита и спасување и на Локалниот совет за превенција, се разгледуваше состојбата со блокадата на регионалниот пат кон Пониква и на Градската депонија кај селото Бели и потенцијалните последици во однос на здравјето и безбедноста на граѓаните.
На состанокот беа повикани и претставници од граѓанските здруженија што ја организираат блокадата на патот.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
