Граѓаните и екоактивистите кои го блокираат пристапот на камионите за собирање и транспорт на отпадот кон градската депонија продолжуваат со протестот и непрекинато, повеќе од 200 часа, го контролираат минувањето на возилата на крстосницата кон Пониква и кон селото Бели.
За да не се злоупотребуваат и извртуваат нивните ставови, додадоа дека нема да даваат поединечни изјави, туку настапуваат колективно и јавноста ќе ја информираат на наменски прес-конференции.
При денешната посета на пунктот каде што се одвива протестот, што ја направи Канал 8 ИПТВ, присутните информираа дека не се откажуваат од своите барања со кои јавноста е веќе запозната, а дел од нив почнуваат и да се исполнуваат.
Според она што може да се забележи на терен, четири од петте барања што се доставени до градоначалникот и претседателот на општинскиот Совет се исполнети или се во фаза на реализација. Од страна на КЈП „Водовод“ обезбедена 24-часовна стражарска служба на влезот на депонијата, која не дозволува пристап за неовластени лица, се работи на расчистување на теренот заради поставување ограда кај главната капија, а потоа и операторот „Ескаватори“ треба комплетно да го огради останатиот дел од просторот. Исто така, се поставуваат столбови со осветлување на сончева енергија, на кои ќе се инсталираат и камери за видео надзор што ќе биде достапен преку мобилен телефон.
За сега неисполнето е првото и главно барање, да се поништи одлуката на Владата со која до изградбата на регионалната депонија кај Свети Николе отпадот од соседните општини Виница, Зрновци и Чешиново-Облешево треба да се носи на депонијата кај Кочани, со што таа од општинска прерасна во регионална.
Состојбата на депонијата во моментот е драстично подобрена во однос од пред десетина дена, ѓубриштето е расчистено, обезбедени се големи количини земја за затрупување на отпадот, нема чадење, а механизацијата на конзорциумот „Бехтел – Енка“ сѐ уште е на терен.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
