Актуелниот градоначалник на Општина Зрновци, Борчо Коцев ја промовираше својата кандидатура на престојните локални избори за втор мандат на истата функција.
На промотивната средба што вечерва се одржа во општинскиот штаб на ВМРО-ДПМНЕ во Зрновци, а на која присуствуваше и Марија Митевска како претставничка од Извршниот комитет на партијата, пред членовите, поддржувачите и жителите, Коцев зборуваше за активностите во изминатиот период, како и за плановите во следниот четиригодишен период.
-Можам само да ветам уште поголема работа, уште поголем број на реализирани проекти, согласно огромната поддршка од Владата на република македонија и премиерот Христијан Мицкоски. Изразувам огромна благодарност за дадената доверба за втор мандат за градоначалник на Општина Зрновци, како и благодарност до жителите коишто беа вклучени во анкетите и теренските посети и мислењето коишто го имаат за мене како градоначалник. Веќе денеска имавме средба со месните комитети, со жителите на селата Видовиште и Мородвис, еве сега и со жителите на село Зрновци, затоа што самата предизборна програма секогаш произлегува од страна на жителите, односно согласно нивните барања за реализирање на проекти. Дефинитивно, како и досега во овие три години, дадовме сериозен фокус на урбанизмот, во завршна фаза ни е разработка на шест урбани блокови коишто ќе придонесат за нови населби, со комплетни содржини, односно градежно земјиште што ќе биде наменето за изградба на бензиска пумпа, станица за технички преглед, хотели, викенд населба, како и терени за спорт и рекреација. Целиот потенцијал и природни убавини коишто ги има општина Зрновци ќе ги ставиме на располагање на сите граѓани на Република Македонија, истакна Коцев.
Поддршка за кандидатурата на Коцев за втор мандат дава и Извршниот комитет на ВМРО-ДПМНЕ, оценувајќи го како успешно неговото досегашно работење.
-Денеска сме во посeта на општина Зрновци, успеавме да посетиме две населени места и да разговараме со граѓаните, да видиме кои се предизвиците коишто имаме можност да ги подобриме, но и да слушнеме што е она што можеме да го ставиме во програмата на идниот градоначалник, актуелниот и иден кандидат, Борчо Коцев. Направивме одлични средби и зборувавме за тоа што успеавме да направиме и од аспект на извршна власт, веќе помина една година или точно нешто повеќе од 13 месеци, да зборуваме за проектите, она што ги засега жителите на општина Зрновци, а тоа е во делот на земјоделието, тоа е во делот на инфраструктурата, тоа е во делот на зголемените плати и на образовните работници, но и на здравствените работници. Продолжуваме со уште позасилено темпо ги градиме темелите на промените, а веќе во општина Зрновци после овој четиригодишен многу успешен мандат на градоначалникот, очекуваме веќе и втор мандат, сигурни сме во убедлива победа, во нешто што ќе значи промени за општина Зрновци, нешто што ќе значи визија за тоа како да го развиеме и нешто што ќе значи подобар живот за граѓаните, истакна Митевска.
На средбите со жителите беше нагласено дека иако е една од најмалите општини во државата, сепак Зрновци има огромен потенцијал за развој за што е потребна визија, а досегашниот градоначалник тоа знае да го препознае и да го реализира, поради што ја добива поддршката од ВМРО-ДПМНЕ да продолжи со работа во наредниот четиригодишен мандат.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
