Комуналната опрема и делови од јавната инфраструктура во Кочани редовно се мета на вандалско оштетување и уништување, а мерките што досега се преземени воопшто не даваат ефект. Ниту безбедноста во сообраќајот на главните градски улици не е доволна, особено во почитувањето на законските одредби за забрането паркирање на пешачките премини, на тротоарите, на кружните текови и во зелените јавни површини.
Поради тоа сè погласни се барањата во јавноста за поставување видео надзор на јавните простори, со што полесно ќе може да се контролира и спречува недоличното однесување на поединци, а ќе помогне и во откривањето на сторителите. Истовремено ќе се обезбеди заштита на општинскиот имот и ќе се подигне нивото на безбедност на јавно-прометните површини.
Во јули минатата година, на седница на Советот на Општина Кочани, како советничко прашање, имаше барање општинската администрација да ја испита можноста да се постави видео надзор.
-Ние советниците сме повикувани преку социјалните медиуми за поставување видео надзор во градот. На координација разговаравме за ова прашање, да видиме во чија надлежност е и колку можеме да реагираме во тој дел. Да излеземе со соопштение дали е во наша надлежност тоа, бидејќи нон-стоп сме повикувани на оваа тема, со цел заштита на опремата на Општината, истакна Ивица Лазаров, член на Советот на Општина Кочани.
Службите во Општина Кочани тогаш најавија дека ќе се направи анализа за законската можност и финансиските трошоци за поставување видео камери на јавните површини, но една година подоцна состојбата на терен е непроменета.
Освен во Скопје, видео надзорот како превентивна мерка веќе е воведен и во некои други општини, а позитивен пример е Кавадарци, каде пред четири години беа поставени безбедносни камери на главните крстосници и на јавните површини во градот. Според одлуката што ја усвоил тамошниот општински Совет, снимките од камерите, согласно законските прописи, можат да се користат и за истражни дејства при извршени кривичини дела.
©2023 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
