Заменик претседателот на Владата, Фатмир Битиќи денеска беше во работна посета на компанијата „Макпрогрес“ од Виница, која е корисник на државна финансиска помош во рамки на Законот за поддршка на инвестициите на домашните компании.
Директорот на „Макпрогрес“, Глигор Цветанов го информираше вицепремиерот Битиќи дека виничката компанија е еден од водечките производители на кондиторски производи во Југоисточна Европа кој извезува во над 55 земји. Освен тоа, располага и со центар за обука за истражување и развој, како и со лаборатории за сензорна анализа и креативно пакување.
-Со „Макпрогрес“ потпишавме договор за финансиска поддршка на инвестиции за четиргодишниот инвестициски циклус 2018 – 2021 година, преку кој на оваа компанија, која влезе во инвестиција од над 215 милиони денари, ѝ исплативме околу 37,5 милиони денари државна помош, од кои над 14 милиони денари за технолошки развој и истражувања. Компанијата креира можности за вработување и развој на вештини во корист на младите во овој регион. Само во Источниот плански регион, во 2022 година поддржавме 57 компании, при што вкупно исплатената финансиска поддршка е над 205 милиони денари. Ќе продолжиме и во иднина да ги поддржуваме домашните компании за внесување иновации и поголема конкурентност на меѓународните пазари со што ги развиваме за да креираат нови работни места, истакна вицепремиерот Битиќи.
Од компанијата „Макпрогрес“ изразија благодарност за држвната поддршка во развојот, при што нагласија дека со планот за инвестиции во последните осум години се вложени 16 милиони евра
-Со новиот развоен план се планира до 2030 година да се инвестираат уште 16 милион евра во развој на нови капацитети и иновативни производи. Ќе очекуваме и понатаму поддршка од државата, особено според Законот за инвестицвии, бидејќи тоа е мотивација плус, за да можеме да влеземе во такви инвестициски циклуси, а се надевам дека кога ќе се отворат и европските фондови допонително преку нив да можеме да инвестираме во автоматизација и во креирање подобра работна средина и подобри производи, истакна директорот на „Макпрогрес“, Глигор Цветанов.
Како потешкотија во развојот, со кој се соочуваат компаниите, беше нагласен недостигот од квалификувана работна сила, а потребата од стручен кадар во „Макпрогрес“ се обезбедува преку обука во сопствениот развоен центар и академија.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
