Неожнеани ниви преполни со вода, натопено оризово класје и канали што претекуваат од парцела во парцела е сликата за кочанскиот оризопроизводен регион што може да се види во последните триесетина дена.
Целодневните обилни врнежи од дожд и големата количина вода што се слева во полскиот регион ги оневозможија земјоделците навреме да го соберат родот од овогодишната реколта на оризот.
Проценките се дека не е ожнеана над една третина од засеаните површини во атарот на селата Спанчево и Соколарци. Такавата состојба е катастрофална, не само за оризопроизводителите кои се директно погодени, туку и за целиот регион кој ќе се соочи со последиците од неповолната состојба.
Комбајните кои со денови стоеја во нивите во очекување на подобрување на условите за жетва, веќе се повлекуваат во селата, без надеж кај земјоделците дека ќе успеат да спасат нешто од штетата.
-Околу 80-90 декари, односно 9 хектари сѐ уште немам оженано, оризот стои во полето. Чекаме на времето, сѐ е на времето, не знаеме кога ќе биде. Ако не се подобри, ќе пропадне сѐ, нема што. Што ќе го правиме, има голема штета. Невреме фати, поплави фатија, делумно полето е под вода веќе, до селото дојде. Веројатно има и повеќе од 20 отсто што не е ожнеано, не знаеме точно, ама има. Може и да остане така, не се знае ништо, се чека на времето. Откуп нема никаков, тоа што го имаме ожнеано стои така, што можевме гледавме да собереме, да го покриеме од невремето, а откуп нема. Цената е за никаде, откупот е за никаде, катастрофа, голема катастрофа, истакна Горан Илиов, земјоделец од Спанчево.
Големиот канал меѓу селата Спанчево и Бања е преполнет, водата поминува под експресниот пат Кочани – Штип и под локалниот патен правец меѓу двете села и ги полни околните ниви. Практично, има поголема количина вода отколку што е потребна дури и во сезоната на сеидба на оризот. Земјоделците велат дека наскоро од оваа вода ќе бидат поплавени и нивите во атарот на Чешиново, каде исто така има неожнеан ориз.
Во откупниот центар на „Еко зрно“ во Спанчево, разочарани од лошата производна сезона, посочија на десетиците тони оризова арпа што се натрупани низ кругот на фабриката за лупење. Дел од оженаните количини стојат на отворено под дождот, целосно под вода и нема да можат да се преработат или пак квалитетот што ќе се добие ќе биде под вообичаените станарди.
Комбајните и механизацијата, што можат да се забележат паркирани на неколку локации, тешко ќе можат да влезат без да заглават во калливите ниви. Земјоделците додаваат дека ако падне снег, тоа дефинитивно ќе биде крај за сите надежи. Едноставно, ќе им преостане да го преораат несобраниот род.
Покрај проблемите за оризопроизводството, високиот водостој на Кочанска Река во близина на селото Долни Подлог е закана од излевање во околните површини. Несобрана ќе остане пченката во околината, а исто така и нивите што се засеани со есенски житни култури веќе се под вода.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
