Сумата што земјоделците во иднина ќе ја плаќаат за воден надоместок е зголемена во просек за околу 70 отсто и се однесува за територијата на целата држава. Со тоа, наместо досегашните 800 денари за декар засеан со ориз, ќе плаќаат нешто повеќе од 1.300 денари во бруто износ.
Одлуката за поскапување на водниот надоместок беше усвоена на една од последните седници на Владата и веќе е објавена во Службен весник, со што новата цена е веќе важечка.
Од АД Водостопанство од поодамна најавуваа дека ќе бараат зголемување на сумата што досега ја плаќаа земјоделците со оглед што цената не била променета повеќе од една деценија. Иако се работи за непопуларен потег, во образложението се наведуваше дека досегашниот надоместок не ги покрива зголемените трошоци за работа.
Покрај зголемувањето на износот на водниот надоместок, ќе се плаќа и услуга за одржување на мрежата, што како давачка постоеше и претходно. Притоа, обврската за нејзино плаќање е за земјоделците кои немаат договори за наводнување, односно кои не се обврзници за воден надоместок, а имаат можности да ги користат ресурсите на каналската мрежа. Со тоа индиректно ќе бидат принудени да ги обработуваат земјоделските површини и да произведуваат храна.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
