Управниот одбор на КЈП „Водовод“ поднесе барање до Советот на Општина Кочани за нова цена за кубен метар геотермална вода, за што предлага да изнесува 64,02 денари. Се работи за покачување од околу 3,4 отсто, односно за 2,12 денари во однос на актуелната цена.
Во краткото обрлазожение што е доставено во барањето стои дека поскапувањето е поради промена на цените на поедини калкулативни елементи што влегуваат во структурата на цената на геотермалната вода. Притоа се додава дека калкулацијата за покачувањето ја изработил стручен тим на „Водовод“ и е во согласност со тарифникот што е објавен во Службен весник бр. 24 од 2020 година, а што е во примена од 1 јануари 2021 година. Други подетални информации за тоа кои се елементите што влијаеле врз поскапувањето, не се наведенни.
Од Советот на Општина Кочани се бара согласност за измената на цената, по што таа ќе влезе во примена, а корисниците на геотермалната вода како енергенс ќе треба да плаќаат повисока сума.
Слично барање, за зголемување на цената од 8 отсто, имаше и на почетокот на минатата година, кога неколку седници по ред советниците не даваа согласност, а од „Водовод“ инсистираа да добијат поддршка. Тогашното образложение за барањето беше дека се прави за да се плати повисоката разлика за концесискиот надоместок што изнесува 16,94 денари за кубен метар и претпријатието го плаќа на сметката на Министерството за финансии.
Тогашната одлука на Управниот одбор на „Водовод“ што се најде пред Советот на Општина Кочани беше доставена по само неколку месеци од последното покачување на цената на геотермалната вода, со кое таа се зголеми за над 83 отсто.
Најновото барање за новата цена пред членовите на општинскиот Совет ќе се најде како точка на дневниот ред од 41. седница што е закажана за в петок.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
