Асоцијацијата за отпадни води на Швајцарија денеска му додели медал на комуналното претпријатие „Водовод“ од Кочани за енергетска ефикасност на станица за пречистување на отпадните води кај селото Мојанци.
На врачувањето на признанието беше нагласено дека се работи за проект во кој владата на Швајцарската Конфедерација инвестираше над 20 милиони швајцарски франци, а неговото функционирање и понатаму се надградува.
-Ова е прв медал што воопшто се доделува на проект што е реализиран и имплементиран надвор од границите на Швајцарија. Признаннието се доделува затоа што беше инсталирана фотоволтаична централа, а заедно со комората за производство на биогас, таа покрива околу 70 отсто од целокупната потребна енергија за преработка и пречистување на отпадните вод, истакна Рето Булер, претставник на консултантнската куќа „ЕБП“ при реализацијата на проектот Пречистителна станица за отпадни води во Мојанци.
Во име на Општина Кочани признанието го прими градоначалникот Љупчо Папазов, при што упати благодарност до сите учесници во реализацијата на проектот за пречистителната станица.
–Заедно со Центарот за меѓународна соработка и развој на Република Словенија правиме дополнителна инвестиција за инсталирање на фотоволтаични панели за 560 киловати. Тоа се постројки што ќе репродуцираат дополнителни количини електрична енергија, со што бројката од 100 отсто за потребите на овој објект, во периодот кога имаме сончеви денови, ќе биде надмината и дел од вишокот на електрична енергија ќе може да се пласира на слободниот пазар, истакна градоначалникот Папазов.
Благодарност за признанието упати и Радостина Стоилкова, раководителка на Пречистителната станица за отпадни води во Мојанци.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
