КЈП „Водовод“ ќе продава дел од старите возила, што со години не се возна состојба и се оставени во стопанскиот двор. Управниот одбор и раководството на претпријатието оцениле дека се работи за дотраени основни средства и нивното евентуално сервисирање би чинело многу повеќе од употребната вредност или пак дека воопшто не можат да се поправаат. Поради тоа донесена е одлука возилата да се продадат, со што ќе се обезбедат дополнителни финансиски средства со кои ќе се подмират дел од тековните трошоци.
Според евиденцијата на возниот парк, на продажба ќе се понудат товарни возила, багери и една нисконосечка приколка. На последната седница на Советот на Општина Кочани беше побарана согласност да се реализира оттуѓувањето, при што од „Водовод“ беше дадено кратко образложение за доставеното барање.
-Се работи за расходувани возила, што се постари и се надвор од функција. Стари се по 20-30 години, па наместо да стојат и скапуваат во Стопански двор, бараме согласност да одат на јавна аукција и да се дојде до некој дополнителен денар. Процедурата е запазена, повикан е проценител кој направи стручна проценка, формирана е комисија, помината е одлуката на Управен одбор, сега бараме поддршка од Советот и очекуваме дека со тоа ќе дојдеме до 500-600 илјади денари, како дополнителни приходи. Ако не дадете согласност ќе се направи штета во толкав износ, истакна Перо Георгиевски, директор на КЈП „Водовод“.
Во дискусиите околу барањето согласност за продажба на возилата, советниците излегоа со оценка дека ваквата постапка укажува оти финансиската состојба во комуналното претпријатие е сериозно влошена, а потребно е оттуѓувањето да се направи внимателно.
-Дали ова е прв случај да се продаваат возила, мислам дека не е лесна состојбата. Да се дојде до продажба, а ниеден директор претходно тоа да не го направил, значи дека е многу тешка ситуацијата. Ќе бидеме конструктивни, но можеби нешто од тие возила може да се искористи за резервни делови, но ќе помогнеме за да можат и привремено вработените да земат плата, истакна Ивица Лазаров, член на Советот на Општина Кочани.
-Ќе дадам поддршка, но треба да се биде внимателен, затоа што некои возила ако се продадат како старо железо ќе се постигне повисока цена. Не знам каква штета ќе се направи ако не се продадат, тие возила ќе стојат и понатаму, ќе нема штета, нема никој да дојде да ги украде, ама ќе дадеме согласност, за да можат и привремените да земат плата, истакна Венко Крстевски, член на Советот на Општина Кочани.
По ваквите укажувања и забелешки, присутните советници на седницата дадоа едногласна поддршка за реализирање на продажбата. Притоа беше укажано дека јавните претпријатија немаат можност да го користат електронскиот систем за јавно наддавање со кој управува ЗЕЛС, поради што обврската за спроведување на постапката ќе ја преземе Комисијата за располагање со недвижен имот на Општина Кочани, во име и за сметка на „Водовод“.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
