Библиотеката „Искра“ од Кочани е домаќин на изложбата „Ромскиот геноцид низ очите на младите“, што се реализира како дел од проектот „Моето право да се сеќавам – меморијализација на ромскиот геноцид“.
Носител на проектот и организатор на изложбата е Регионалната ромска образовна младинска асоцијација, во соработка со Регионалната канцеларија за младинска соработка.
–Изложбата се фокусира на прогонството на Синтите и Ромите, од нивното исклучување и обесправување во Германскиот Рајх до системското истребување во нацистичка Европа. Поделена е во три дела, при што првото поглавје го истражува потеклото на прогонството на Ромите, „Вовед на геноцид пред Втората светска војна“. Во второто поглавје е опфатен геноцидот на Ромите и нацистичките злосторства за време на Втората светска војна, а третото поглавје се занимава со повоената историја и современите предизвици на ромскиот геноцид. Податоците и фотографиите откриваат уништени животи зад бирократските документи што го запишуваат организираното уништување, истакна Урмета Арифовска, заменик-директорка на Регионалната ромска образовна младинска асоцијација.
Изложбата „Ромскиот геноцид низ очите на младите“ ќе биде отворена до крајот на оваа недела и таа нуди и информации за состојбата со човековите права на Синтите и ромските малцинства во Европа по 1989 година. Притоа повикува на заземање јасен став против маргинализацијата и омразата, преку подигање на свеста, обезбедување информации и создавање култура на сеќавање.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
