Под мотото „Сакам бистар ум, затоа читам!“ во библиотеката „Искра“ денеска беше отворен 18. Саем на книгата, како дел од активностите за одбележување на Месецот на книгата.
На штандовите се претставуваат 13 издавачки куќи, што се меѓу најпознатите и најреномирани во државата, а со кои кочанската библиотека соработува подолг период.
Меѓу големиот број наслови, љубителите на пишаниот збор имаат можност да пронајдат жанровски разновидна литература.
-Имаме можност да разгледаме голем број на наслови, и за возрасни и за деца. Книги од македонски и странски автори од современа современата книжевност, класици, драми, од романите – крими трилери, авантури и акции, романси, научна фантастика историски романи, популарна психологија. За деца, исто така, имаме голема понуда почнувајќи од боенки, сликовници, книги со налепници, звучни сликовници, друштвени едукативни игри, детски романи, детски енциклопедии, збирки приказни итн. Како што го одржуваме телото со физички вежби, така треба да го негуваме и духот, убаво би го негувале со читање книги, затоа што читањето нема никакви недостатоци, а може да има само предности. Да го негуваме духот, за во здраво тело да имаме здрав дух, за да имаме бистар ум, да бидеме остроумни, да донесуваме секогаш вистински одлуки во животот, истакна Мара Анастасова, координаторка на Саемот на книгата.
Присутните на Саемот ги поздрави и градоначалникот на Љупчо Папазов, кој воедно ја отвори манифестацијата.
-Во време на една дигитална трансформација, во време на едно современо општество на дигитализација и технолошки напредок, ова е еден сериозен предизвик да се вратиме на книгата, да се вратиме на читањето, кое сепак не излегува од мода. Затоа благодарност до сите 13 издавачки куќи кои земаат учество, кои нудат свои наслови од различни жанрови, кои заеднички со матичната библиотека прават обид да ја негуваат навиката за читањето и да го промовираат читањето и љубовта кон книгата, истакна градоначалникот Папазов.
На отворањето на Саемот на книгата, беше претставена авторката Фросина Пармаковска, која за својот роман „Сè уште можам нешто да сторам“ е овогодишна добитничка на „Рациновото признание“.
Саемот на книгата во билиотеката „Искра“ ќе биде отворен до 9 ноември, а граѓаните ќе можат да го посетат во период од 10 до 18 часот.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
