Во рамки на кампањата „16 дена активизам против родово базирано насилство“, Општина Виница се вклучи во програма на ЕУ и Советот на Европа – РОМАКТЕД фаза 2, при што организираше работилница на тема „Обединето против насилство врз жените и девојчињата“.
На работилницата присуствуваа жени и девојчиња од ромската заендица, пред кои претставници од Општината, од Центарот за социјални работи и од Полициската станица од Виница зборуваа за формите и мотивите за семејно насилство, како и за начините за негово препознавање и пријавување кај надлежните.
-Домаќини на настанот се Општина Виница, во соработка со Министерството за внатрешни работи и Министерството за труд и социјална политика, а нашата идеја е на жените и девојчињата да им кажеме дека не смеат да трпат насилство, да им кажеме дека секогаш кога има одредена форма на насилство или дискриминација треба да ја пријават кај самите институции. Затоа, во рамки на настанот ќе направиме и промоција на една апликација што се вика „Биди безбедна“ на којашто секоја од нив има можност да пријави одредена форма на насилство, истакна Тодор Стојчевски, фацилитатор на работилницата.
Активисти од ромски невладини организации истакнаа дека жените од нивната заедница сѐ повеќе ги надминуваат предрасудите и го пријавуваат насилството врз нив.
-Токму во тој дел работевме, да ги охрабриме жените и сега веќе има промена, така што веќе не е како порано, сега се поохрабрени. Пред тоа се тргаа за да не даваат изјави, да не ги доставуваат своите барања до надлежните органи, сега се послбодни. Имаше такви случаи, но невладиниот сектор делуваше заедно со институциите и се охрабрија жените, истакна Али Мустафов, граѓански активист.
Од Центарот за социјални работи во Виница истакнаа дека во општината е регистриран пораст на борјот на пријавнен случаи на насилство врз жените и девојчињата.
-Самите жртви повеќе се охрабруваат да дојдат и да проговорат, да зборуваат за нивните проблеми и да ги пријават насилствата. Бидејќи некои се сѐ уште активни, некои се пасивни, како семејно насилство имаме три активни предмети како бројка. Вкупно беа шест, од кои три се активни, две имаат престанок на мерките, додека за едно од нив, што исто така има престанок, беше базирано на родово насилство. Како што спомнавме, освен пријави за семејно насилство, има пријави и за други видови, а едно од нив е родово базираното насилство, истакна Сашка Дончева од Центарот за социјални работи во Виница.
Во рамки на програмата РОМАКТЕД фаза 2, работилница на тема „Како да го препознаеме и да превенираме родово базираното насилство меѓу децата“ се реализараше и во Кочани. Во интерактивна комуникација со ученици од шесто до деветто одделение од ОУ „Раде Кратовче“, едукатор од UN Women разговараше за формите, мотивите и начините на препознавање на родово базирано и семејно насилство.
Работилниците во Виница и Кочни се дел од заедничката програма на ЕУ и Советот на Европа – РОМАКТЕД фаза 2, во соработка со проектот „Зајакнување на активностите против трговија со луѓе во Северна Македонија“, кој се имплементира преку програмата на Европската Унија и Советот на Европа „Хоризонтален инструмент за Западен Балкан и Турција“.
Со работилницвите се настојува да се подигне општествената свест и да се поттикне размислување за индивидуалниот и колективниот придонес во борбата за спречување на родово базираното насилство.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
