Неколку стотини натпреварувачи, од предучилишна возраст до пензионери, учествуваа на традиционалните Тодорови трки што денеска се одржаа на градскиот стадион во Виница.
Манифестацијата бележи скоро едновековна традиција и е поврзана со верското празнување на Тодорова сабота, а организатор е Локалната самоуправа на Виница со поддршка од локалниот бизнис сектор.
-Горди сме што и годинава ја продолжуваме традицијата на еден од најмасовните културно-спортски настани во нашата општина. Масовно сме собрани овде што го покажува интересот на граѓаните за одржување на спортскиот дух и заедничкото дружење. Со одржување на оваа манифестација придонесуваме за негување, афирмирање и популаризирање на културното наследство, а на младата популација ги пренесуваме духовните и спортски традиции што се карактеристични за нашиот крај и за одбележувањето на верскиот празник посветен на Свети Тодор, истакна градоначалникот на Виница, Миле Петков.
Учесниците на трките се натпреваруваа во десет дисциплини, а најмасовни беа детските и младинските категории кои ги одмерија силите во трчање и возење велосипед. Меѓу поатрактивните дисциплини во сениорска конкуренција беа трчањето во вреќа, пренесувањето јајце во лажица, трчање со патерици и влечење јаже.
За победниците во секоја категорија беа обезбедени вредни награди како донација од приватни компании во Виница и Кочани. Во рамки на манифестацијата имаше и музичко-забавна програма со настап на локален дувачки бенд.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
