Во институционална процедура влезе иницијативата на Општина Зрновци за изградба на акумулација на реката Зрновка, по барањето што минатиот месец беше испратено до Владата.
Од кабинетот на премиерот е добиен писмен одговор дека целокупниот предмет се проследува на натамошно надлежно постапување до Министерството за земјоделство, шумарство и водостопанство и до Министерството за транспорт и врски. Притоа им се укажува на двете министерства да ја известуваат Локалната самоуправа на Зрновци за нивните постапки и преземените чекори.
Според редоследот на активностите, за да се реализира целата инвестиција неопходно е претходно да се изработи урбанистички план за подрачја и градби од државно значање, како и физибилити студија со проектна документација.
-Иако со децении се зборува за акумулација на Зрновка и тоа е сон на секој граѓанин и посетител на општина Зрновци, конечно се направени првите конкретни чекори. Ваквата градба од државно значење би била од витално значање за пет соседни општини, како и нова економска слика за општина Зрновци од аспект на туризам, спорт, хидроелектрана, водоснабдување на домаќинства, како и наводнување на земјоделски површини што се протегаат во петте соседни општини. Веруваме дека овој голем почеток ќе триумфира со целосна изградба на акумулација на кањонот на Зрновска река, истакна градоначалникот Борчо Коцев.
Активностите што ги презема Општина Зрновци се во рамки на проектот „Урбанистички план за подрачја и градби од државно значење”, а со кој се обврзува да ги изработи потребните подзаконски акти и целокупната документација да ја достави до Министерството за земјоделство и Министерството за транспорт и врски, кое е надлежно за донесувањето на урбанистичкиот план.
На реката Зрновка веќе има водозафат за малата хидроцентрала изградена во 1950 година, што произведува околу 1,6 мегавати електрична енергија, а со новата акумулација би се овозможила изградба на хидроелектрана со поголем капацитет.
©2023 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
