Општина Кочани почнува постапка за уредување на просторот во месноста Колерски Гробишта во населбата Трајаново Трло, каде е планирано да никне нова парковска површина. Објавен е јавен повик за избор на изведувач на градежните работи, за што од општинскиот буџет е предвидено да се потрошат над 520 илјади денари.
Според техничката спецификација, на просторот што со години е затрупан со отпад, ќе се уреди парк на површина од околу 550 квадратни метри. Предвидено е на поголем дел да се направи хортикултурно уредување со тревни површини, а на околу стотина квадратни метри да се изгради патека со бехатон плочки и бетонски рабници. Исто така, ќе се постават неколку клупи, како и мала фонтана изработена од лим, со придружна инсталација што ќе обезбедува вода за пиење.
Рокот за пријавување на заинтересираните изведувачи е до 6 јули, а по потпишувањето на договорот и воведувањето во работа, избраниот најповолен понудувач ќе има обврска градежните работи да ги комплетира во рок од три месеци.
Неколкупати досега Локалната самоуправа правеше обиди да го среди просторот во Колерски Гробишта, при што во февруари 2017 година изгради и мултинаменско спортско игралиште. Неколку недели подоцна тоа беше оштетено, а реквизитите искршени. Пред три години беше реализирана голема акција за целосно расчистување на просторот од отпадот, но не помина повеќе од еден месец, а состојбата се врати по старо. Во меѓувреме имаше уште неколку активности за средување на просторот, но сите останаа без долгорочен ефект.
Дополнителен проблем е што отпадна вода, измешана со фекалии, се излева кај спојот на улиците “Цветан Димов“ и “Наум Наумовски – Борче“ во непосредна близина на спортското игралиште. Жителите од овој дел на Кочани со години реагираа и бараа надлежните служби во Општината и во КЈП “Водовод“ да преземат мерки за поправка на канализацијата, но видливи активности немаше.
Дали уредувањето на парковската површина ќе го смени изгледот на целиот простор, тешко е да се каже, но досегашното искуство покажува дека инвестицијата ќе биде без ефект ако постојано не се води грижа за јавните површини. И тоа, не само на оваа локација, туку во целиот град.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
