На спортскиот терен во дворот на гимназијата „Љупчо Сантов“ попладнево почна дводневен турнир во баскет „3х3“, чиј организатор е Здружението на граѓани „Три икс три“ од Кочани.
Повод за организирање на спортскиот настан се празниците 7 и 8 Септември, а организаторите нагласиј дека една од целите е збогатување на празничните содржини и унапредување на спортскиот дух, особено меѓу младите.
-После подолг период во Кочани се одржува турнир во баскет чиј цел е да се подобри дружењето меѓу граѓаните од различни генерации, поради што и нашето мото е „Ако не е награда, нека биде дружба“. Сакаме да го јакнеме спортскиот дух, а желба ни е турнирот да прерасне во традиционален. Годинава имаме вкупно 12 екипи од општините Кочани, Берово и Чешиново-Облешево, а за првите три најдобропласирани се обезбедени парични награди од 30, 20 и 10 илјади денари. Финансиската и материјалната поддршка за одржување на турнирот ја обезбедија Општина Кочани и други спонзори, истакна Филип Димитриев, претседател на Здружението „Три икс три“.
Организаторите на турнирот имаат сериозен пристап кон натпреварите, обезбедени се судии и стручни лица, а се игра според меѓународните правила.
-Екипите се поделени во четири групи во чии рамки секој ќе игра против секого, првите две ќе преминат во четвртфинале, потоа во полуфинале и на крајот во финале. Завршните натпревари ќе се играат на 8 Септември, а финалето е од 17 часот. Интересно е што на турнирот има екипи чии членови се баскеташи, но има и кошаркари кои се активни во клубовите. Постои заинтересираност и од другите градови, со кошаркари кои зад себе оставиле печат во кошарката, па нашиот план е догодина да има вкупно 24 екипи, а да поканиме учесници и од други градови, истакна Љубомир Игнатов, член на Здружението „Три икс три“.
Турнирот во баскет има и културно-уметнички карактер, паузите се проселдени со музика, а посетителите уживаат во битовите на повеќе DJ артисти.
©2023 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
