Под мотото „Различноста е наша сила“, во ОУ „Никола Карев“ се реализира проект за спортски активности за децата со тешкотии во развојот. На неколку работни полигони во училишната спортска сала се спроведуваат физички вежби со поддршка од наставниците и стручните служби.
-Нашите ученици од училишниот спортски клуб ,,Берни Спорт”, заедно со дечињата со тешкотии во развојот кои секоја сабота учествуваат во нашиот самостоен проект ,,Час по физичка активност” имаа полигони и препреки кои ги совладуваа заедно како еден тим. На крајот на сите ученици им доделивме златни медали, бидејќи сите тие се победници и пример како сите ние треба да живееме без предрасуди. Исто така, учениците и родителите играа футсал помеѓу себе, а сето тоа е одличен настан во кој покажавме дека сите сме исти и дека разликите не се пречка, напротив се наши предности, се истакнува во известувањето од ОУ „Никола Карев“.
Во рамки на активностите, настап имаше и училишниот хор, а сите средства што се собрани од проектот ќе бидат наменети за опремување на ресурсната соба во училиштето.
Од ОУ „Никола Карев“ упатуваат благодарност за поддршката до наставниците по физичко и здравствено образование и ликовна уметност, училишниот хор со наставничката по музичко воспитание, училишниот дефектолог, до Црвен крст – Кочани, до родителите на учениците и на дечињата со тешкотии во развојот и до судиската организација при Општинскиот фудбалски сојуз – Кочани.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
