Со одигрување на првото коло викендов почна првенството во Третата фудбалска лига – исток.
Виничка „Слога 1934“ гостуваше во Берово против „Малеш“ и забележа победа од 3:0. Со тоа го потврди успешниот настап од претходното првенство и најави дека ќе ја продолжи борбата за освојување на врвот и пласман во Втората лига. Гостите од Виница во водство дошле со погодокот на Ѓорѓиев, а до крајот на првото полувреме во листата на стрелците се запишал и Николов, со што на пауза се отишло со два гола предност. Добрата игра продолжила и во вториот дел при што Воинов го поставил конечниот резултат и ги потврдил трите бода за својата екипа.
Во следното коло „Слога 1934“ ќе биде домаќин против тимот на „Тиверија“ од Струмица, кој на првиот натпревар од новото првенство загуби на домашен терен од делчевска „Брегалница“.
За разлика од виничкиот третолигаш, новајлијата во лигата, екипата на „Светлост“ од Зрновци доживеа пораз од 3:1 на гостувањето во Свети Николе против „Овче Поле“. И покрај негативниот резултат, гостите прикажале добра игра и им се спротивставиле на домаќините кои и годинава се меѓу главните претенденти за освојување на првото место. Добрата игра на екипата од Зрновци ја потврдува и фактот што првото полувреме завршило без голови, а гостите први го отвориле резултатот со водството на почетокот од второто полувреме, при што стрелец на погодокот бил Голчевски. Набргу домашните играчи ја покажале својата подобра физичка подготвеност и го изедначиле резултатот со голот на Трендафилов. До крајот на средбата погодоци за „Овче Поле“ постигнале Панев и Нацев.
Во следното коло „Светлост“ на домашен терен ќе се сретне со „Малеш“. Од управата на клубот информираа дека со поддршка од Локалната самоуправа се работи на обезбедување соодветни услови на фудбалскиот терен во Зрновци, односно уредување на соблекувалната и поставување натстрешници за официјалните лица и за резервните играчи.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
