Вкупно 136 ученици од двете струки во СОУ „Љупчо Сантов“ годинава ќе го завршат средното образование. Средношколците матурата за прв пат од оваа учебна година ќе ја полагаат во поголемите простории со кои располага училиштето. Училишната секретарка за матура, Катерина Димитрова рече дека со државната матурa се следи квалитетот во средното образование,
-Оваа учебна година имаме вкупно 136 ученици во четврта година, од кои 129 ќе полагаат државна матура, тројца ученици избраа училишна матура и четворица ќе полагаат завршен испит. Новитет од оваа учебна година е и тоа што учениците, наместо во училница матурата ќе ја полагаат во поголемите простории на училиштето, односно спортските сали или холовите при училиштата, каде се исполнуваат условите што ни ги бараат од Државниот испитен Центар, истакна Катерина Димитрова, секретарка на матура во СОУ „Љупчо Сантов“.
Државната матура се полага според посебни испитни програми што се темелат на целите на наставните програми за соодветните предмети кои се вклучени во листата за државна матура. Таа опфаќа задолжителен, изборен дел и проектна задача.
Училишната матура е наменета за учениците од гимназиското образование кои не се определиле за државната матура. Целта на испитот е добивање сертификат за завршено гимназиско образование.
Завршниот испит пак, го избираат учениците од четиригодишното средно стручно образование кои нема да полагаат државна матура и по завршувањето на испитот тие ќе добијат сертификат за завршено четиригодишно средно стручно образование.
Средношколците треба да изготват и Проектна задача која е составен дел од државната, училишната матура и завршниот испит. Таа служи за проверка на практичната способеност на ученикот за вршење на работи од областа на струката.
Двата екстерни испита во јунската испитна сесија ќе се полагаат на 1 јуни, додека на 8 јуни ќе се полага изборниот испит.
Матурантите кои во јунската сесија нема да ја положат државната матура, ќе имаат можност да се пријават за августовската сесија кога двата екстерни испита ќе се полагаат на 12 и 14 август.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
