Градежна механизација и работници ангажираше водостопанската подружница „Брегалница“ од Кочани за ископ и чистење на каналите за наводнување на оризовите површини пред почетокот на новата сеидбена сезона.
Машинското отстранување на наносите од земја и на израснатата вегетација почна на десниот магистрален канал, на делницата меѓу селата Истибања и Оризари, во должина од десетина километри. Истовремено, рачно се чистат и десетина километри помошни канали и земјени вади што ја носат водата до земјоделските површини во регионот.
-Поволните временски услови во овој период ни овозоможуваат чистењето и оспособувањето на каналската мрежа да се реализира според планираната динамика и покрај пречките што ги имавме поради дефекти на механизацијата. Паралелно со отстранувањето на отпадот во десниот магистрален канал, се работи на поправка и бетонирање на паднати и оштетени кампади, а ќе следи и обновување и зајакнување на речните брегови за да се спречат евентуалните излевања и пролетни поплави. Според планот за активности за оваа сезона, треба да се исчистат околу 300 километри канали и земјени вади на подрачјето што го покрива нашата подружница, истакна Благојчо Богатинов, раководител на ВП „Брегалница“ – Кочани.
По завршувањето на активностите на десниот магистрален канал кај Оризари, чистењето ќе продолжи кон селата Спанчево и Соколарци, каде исто така ќе се работи на оспособување на наводнителните канали.
Годишниот план за наводнување на оризовите полиња во Кочанско сè уште се подготвува и ќе зависи од количините што ќе се акумулираат во хидросистемот Брегалница. Во моментот во браната Калиманци има околу 73 милиони кубни метри вода, а до почетокот на сезоната за наводнување има повеќе од два месеца. Поради тоа, се очекува нејзиниот капацитет да се исполни со уште една третина и да се обезбедат потребните количини вода за над 4.000 хектари под ориз.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
