В.д. градоначалникот на Општина Кочани, Венко Крстевски прв ја најави својата кандидатура за истата функција на локалните избори што ќе се одржат во октомври годинава.
Во гостувањето на поткастот „Политиканти“ на платформата „Инфомакс“, тој нагласи дека довербата од гласачите ќе ја бара како независен кандидат. Смета дека двата мандата како член во Советот на Општината, за што беше избран на листа од група избирачи поддржана од граѓаните, е доволна потврда дека може активно да учествува во изборниот процес.
-Јас ќе се кандидирам на наредните избори, сум прв независен советник во рамки на Советот на Општина Кочани во два мандата, со освоен најголем број на гласови како советник. На наредните избори ќе се кандидирам како независен градоначалник и се надевам на огромна поддршка од кочанчани којашто ја имам и во овој период. Таа поддршка ќе ми помогне да го смениме целиот процес во градот, да успееме да го возобновиме и да направиме Кочани да биде пристојно место за живеење, со посебен акцент за перспектива на младите. Бидејќи младите се на удар, тој песимизам нормално ги зафаќа најмногу нив, а јас ќе ги искористам младите за тотално да ја смениме таа траекторија на движење, којашто беше и пред настанот во дискотеката „Пулс“, меѓутоа после „Пулс“ не смее ништо да биде исто во државата, тоа е лекција која треба да биде научена, истакна Крстевски.
Образложувајќи ја актуелната состојба во Кочани по големата трагедија во март, меѓу приоритетите што треба да се реализираат во најкраток период, Крстевски го потенцираше пуштањето во употреба на новоизградената детска градинка „Детелинки“ во населбата Драчевик, потоа создавање простор за културно-општествени активности за младите, како и изградбата на дом за стари лица.
На локалните избори во октомври 2021 година беа поднесени пет кандидатски листи за членови на Советот на Општина Кочани, а советничката листа поддржана од група избирачи, чиј носител беше Венко Крстевски, доби 1.279 гласа. Тоа беше трет најдобар резултат, по листите на ВМРО-ДПМНЕ со 6.196 и на СДСМ со 6.174 гласови, за Крстевски да обезбеди втор мандат за советник.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
