Ветераните на ФК „Осогово“ в сабота, 1 јули, ќе организираат меморијален фудбалски натпревар, во спомен на 50-годишнината од трагичната смрт на нивниот другар и соиграч – Никола Мантов.
На стадионот во Кочани, што го носи името на Мантов, ќе гостува штипска „Брегалница“. За двете екипи ќе настапат повеќе поранешни фудбалери, кои на спортски начин ќе му оддадат чест на првотимецот на „Осогово“, кој почина од срцев удар на фудбалскиот терен.
На средбата што на 1 јули 1973 година се играла со некогашниот ФК „ФАС 11 Октомври“ од Скопје, во 10-та минута од првото полувреме, при резултат 1:0 за домаќините, како последица од срцев удар, на теренот како покосен паднал 23-годишниот фудбалер на “Осогово“, Никола Мантов – Мендиз. Иако веднаш бил префрлен во болницата во Кочани, лекарите ја констатирале смртта.
Меморијалниот натпревар в сабота, на стадионот „Никола Мантов“ ќе се игра со почеток од 16 часот, а ветераните на „Осогово“ ги покануваат сите љубители на спортот и навивачите да присуствуваат на настанот.
©2023 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
