Извршниот одбор на СДСМ одлучил за претстојните локални избори да ги предложи Гоце Милевски и Ванчо Митев како кандидати за градоначалници на општините Виница и Зрновци.
Одлуката ја соопшти на прес-конференција партискиот претседател Венко Филипче, при што истакна дека се предложени кандидати за градоначалници на уште 14 општини.
Предложените кандидати за двете општини во регионот се актуелни претседатели на општинските организации на СДСМ.
Гоце Милевски е магистер по менаџмент, бизнис и администрација, и во изминатиот период беше раководител на Подрачната служба на Фондот за здравствено осигурување во Виница. Освен тоа, во скоро четиригодишниот мандат е член на Советот на Општина Виница.
Ванчо Митев дипломирал на Факултетот за физичко образование, спорт и здравје во Скопје, а во изминатиот период беше раководител на подржницата на Македонска пошта во Кочани.
-Во претстојниот период започнуваме отворен процес на слушање, дијалог и соработка со секој поединец, секое семејство, секоја месна заедница. Верувам дека Зрновци има огромен потенцијал – во земјоделието, во младите, во искрената човечка солидарност која секојдневно ја гледаме во нашето мало, но гордо место. Верувам дека можеме да создадеме општина во која младите ќе останат, а повозрасните ќе живеат достоинствено. Општина каде што ќе се работи чесно, одговорно и со визија, истакнува Митев во објавата на социјалните мрежи.
Извршниот одбор на СДСМ досега ги истакна кандидатурите за градоначалници на триесетина општини во државата, но до сега сѐ уште нема најава кој ќе биде нивен кандидат на локалните избори во октомври за прв човек на Општина Кочани.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
