Инцидентот во Советот на Општината што се случи на 65. седница, по кој Кочани стана додатно „актуелно“, отвора низа прашања, меѓу кои и такви поврзани со безбедноста на присутните во салата за седници.
Службеничката вработена во Општина Кочани, којашто вчера беше повредена од удар со полно пластично шише со вода, несомнено доживеа огромен стрес, физичка и психичка болка.
Помошник-раководителката во Секторот за општи и правни работи и јавни дејности во Општина Кочани, Ана Кралева, за Канал 8 соопшти дека направила неколку лекарски прегледи и снимки и дека за среќа, поминала со полесна повреда. Кралева истакнува дека последниве неколку години, Советот воопшто не е безбедно место за работа и дека неколкупати барала администрацијата што ги следи седниците да седи засебно од членовите на Советот.
Всушност, наместо да биде место на спротивставени мислења, ставови и гледишта што ќе се бранат со аргументи, Советот на Општина Кочани како да се претвора во арена/бојно поле.
Колку чини една седница на Советот?
Секој советник за една седница, значи месечно, добива паушал од околу 24 илјади денари, а претседателот на Советот – 30 илјади денари.
За членовите на Советот на Општина Кочани од општинскиот буџет на месечно ниво се исплаќаат 462 илјади денари.
За една година граѓаните плаќаат околу 90 илјади евра за финансискиот надомест за сите советници.
И, тоа не е сѐ.
Пред почетокот на мандатот секој советник добива нов преносен компјутер и мобилен телефон со платена месечна сметка, а од општинскиот буџет се обезбедуваат и трошоци за репрезентација.
Дали овој инцидент ќе ја смири политичката нетрпеливост во Советот на Општина Кочани – останува да покаже времето. Претстојните локални избори – со сигурност ќе го сменат неговиот актуелен состав.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
