Групацијата „Алтернатива“ во изминатите месеци, по трагедијата во клубот „Пулс“, реализираше повеќе групни работилници за блиските на настраданите и за повредените, како и психоедукативни активности за пошироката заедница.
Работилниците се во рамки на проектот „Простор за поддршка“ чија цел е да се понуди соодветен, достоинствен и етички пристап во поддршката на семејствата на настраданите и за граѓаните во Кочани од страна на психолози и стручни лица.
-Ова е втората фаза на нашите активности каде што на ред е третата трибина чија тема се ритуалите, како тие заедно со симболите им помагаат на луѓето да се справат при такви тешки состојби, односно трагични ситуации. Претходно имавме две трибини на кои зборувавме за други теми, едната беше како да се препознаеме во загубата, кои се фазите, при што зборувавме дека колективната загуба не може да се третира како и другите загуби. На втората трибина зборувавме за тоа како да се препознае хронична болка и што значи кога болката го задржува својот интензитет – тагата, и како во таа ситуација да тргнеме да се сорвауваме со тоа што се случува во нас. Неретко се случува во вакви силни настани да дојде во семејствата до разводи, загуба на работа, деликвентно, девијантно однесување кај младите и да не ги пропуштиме психосоматските заболувања, болки во стомак, чир, астма и сѐ така понатаму. Затоа сметаме дека овој момент е клучен да се приклучат граѓаните во активностите, да ја прифатат помошта што им се нуди, а ние ги креираме и прилагодуваме нашите актовности врз основа на потребите што ги согледуваме за време на овие трибини, истакна Тина Чачоровска, стручен соработник во групацијата „Алтернатива“.
Активистите и соработниците во групацијата „Алтернатива“ истакнуваат дека трагедијата во Кочани е специфична и досега никој немал слично искуство во справувањето и давањето поддршка за сите засегнати лица, со оглед што се работи за масовна траума и широк пострауматски шок и притисок. Практично, со одржувањето на работилниците во Кочани, преку контактот со луѓето, и стручните лица добиваат повратна спрега, учат и стекнуваат искуства за тоа како треба да се работи во слични ситуации.
-Ние сме едуцирани и постојано сме под супервизија, правиме редовни брифинзи и дебрифинзи пред самата трибина и после трибината, но секако и за нас е ова огромно ново искуство. Сме работеле со разни трауми, но со ваква од огромен размер колективна траума, до сега не сме имале прилика и ова за нас навистина е ново искуство. Буквално учиме во целиот процес и ние, а се доградуваме како експерти, истакна Лела Ставрева, психолог и надворешен соработник во групацијата „Алтернатива“.
Активностите околу групните трибини и работилниците, групацијата „Алтернатива“ ги реализира во просториите на Мултикултурниот центар во Кочани.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
