Во протоколарна посета на Општина Виница денеска беше делегација од Амбасадата на НР Кина со претставници на раководниот тим на кинеската компанија „Синохидро“, која кај нас реализира проекти од сообраќајната инфраструктура.
Делегацијата што ја предводеше Хе Бингхуа, советник во економско-трговската канцеларија на Амбасадата, се сретна со градоначалникот на Виница, Миле Петков, кој го информираше за досегашната соработка и активностите што се реализирани со кинеска поддршка.
-Соработката ја почнавме минатата година со посетата што кај нас ја направи амбасадорот на НР Кина, а резултат од тоа е што добивме техничка опрема за видео снимање и пренос во живо на седниците на Советот на Општината. Со тоа се овозможи поголема транспарентност на работата на советниците. Денеска добивме уште една донација, се работи за 180 ЛЕД рефлектори за јавно осветлување, што ќе бидат поставени на институциите, односно во училиштата, градинките, спортските терени и други јавни објекти во градот и во населените места во општината, истакна градоначалникот Петков.
На средбата беше изразена подготвеност соработката да продолжи и да се продлабочува, посебно по ангажманот на кинеската компанија „Синохидро“ во изградбата на патната инфраструктура во Источниот регион.
-Пријателството и добрата соработка помеѓу двете држави се потврдуваат и преку оваа донација за Општина Виница. Исто така, на најдобар начин ја претставува дејноста на „Синохидро“ во јавните инфраструктурни проекти, но и нејзината општествена одговорност за граѓаните на оваа земја. Се надеваме дека оваа донација ќе има голем придонес во подобрувањето на условите за заедницата, а во иднина нашата соработка ќе биде уште поплодна, истакна советникот Хе Бингхуа.
Претставниците на компанијата „Синохидро“ нагласија дека веќе десет години се присутни во реализацијата на инфраструктруните проекти во македонските региони, поради што задоволството од довербата го изразуваат со свои донации и давањето придонес во економскиот и општествениот развој на овдешната заедница.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
