Две децении трае агонијата на зградата на Воен отсек во Кочани, која се наоѓа на атрактивна локација во централното градско подрачје, во близина на крстосницата на улиците „Тодосија Паунов“ и „Никола Карев“.
Објектот што го користеа државни институции, од кои некои се во надлежност на министерствата за финансии и за одбрана, е во континуирано распаѓање. Грдиот надворешен изглед, го дополнува уништената внатрешност со што објектот повеќе наликува на сцена од хорор филм, отколку простор во кој треба да работат државни службеници.
Неколкуте најави и обиди на локалната власт да се најде решение за оваа зграда досега не дадоа видливи резултати. Според објективните околности дел се поради имотно-правни лавиринти меѓу корисниците на просторот, а според мислењата во јавноста веројатно дел се и поради бизнис и други интереси.
На 65. Седница, што се одржа пред два дена, Владата донесе одлука „за престанок на корисничко право на недвижен имот на УЈП и давање на трајно користење, без надоместок, недвижна ствар на Акционерското друштво за изградба и стопанисување со станбен простор и со деловен простор од значење за Републиката – Скопје, недвижен имот, деловни простории на улица ,Н. Карев’ запишани на КП 13700, КО Кочани, со имотен лист бр. 12270, сопственост на Република Северна Македонија“.
Уште во средината на 2019 година тогашната локална власт најави дека се водат разговори со АД за изградба и стопанисување со станбен и деловен простор, откако претходно било договорено со Министерството за одбрана и со Министерството за финансии да го ослободат објектот.
Општина Кочани пред десетина години дури и го измени Деталниот урбанистички план за оваа локација со што овозможи да никне нова, повисока зграда со намена за домување и комерцијална дејност. Со последната одлука на Владата, практично се отвора можност Акционерското друштво да почне постапка за реализација на таквиот план.
Зградата што меѓу граѓаните е позната како Воен отсек е изградена пред околу шест децении и освен една надворешна реконструкција во почетокот на 80-те, досега немало други поправки и градежни интервенции. Во неа Министерството за одбрана поседуваше 573 метри квадратни, а 271 метар квадратен имаше Управата за јавни приходи. Помал дел му припаѓаше на Центарот за управување со кризи, а корисник на простории беше и ОУ „Никола Карев“.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
