Доброволното противпожарно друштво – Кочани и годинава се вклучи во акцијата „И јас сум дете“ за обезбедување на новогодишни пакетчиња за деца од социјален ризик.
Станува збор за иницијатива преку која на неколку локации во Кочани се поставени кутии за донација на новогодишни подароци што пред Нова Година ќе бидат поделени на деца од ранливите категории. Ова е хумана активност на пожарникарите доброволци, која веќе трае три години.
-Доброволното противпожарно друштво како и изминативе две години, така и годинава го организира проектот „И јас сум дете“, во кој собираме новогодишни пакетчиња, односно граѓаните на Кочани донираат новогодишни пакетчиња на местата каде имаме поставено кутии за донации, а тоа се „Кузе моторс“, „Лео играчки“ и маркетите „Кај Тоше“, „Разнопромет“ и „МЈБ Рич“. Ги повикуваме сите граѓани кои се во можност да донираат пакетчиња на веќе утвредните локации. Новогодишните подароци ќе бидат собрани од наша страна, а потоа ќе ги доделиме на децата од социјален ризик, истакна Златко Илијев, претседател на Доброволното противпожарно друштво – Кочани.
Оваа година новогодишните подароци ќе се поделат само на територијата на општина Кочани. Илијев додава дека искуствата од минатите две години за нив се од големо значење, затоа што Кочани бил помеѓу првите градови од државата што собрал најмногу новогодишни пакетчиња како резултат на хуманитарната акција „И јас сум дете“.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
