Доброволното противпожарно друштво – Кочани синоќа ја одржа хуманитарната Гала вечер, на која беа истакнати досегашните успешно реализирани проекти, но и идните планови на кочанските доброволци.
На настанот присуствуваа претставници од бизнис секторот, од Локалната самоуправа, донатори и граѓани.
Претседателот на ДПД – Кочани, Златко Илијев рече дека минатата година била многу успешна, за што сведочат големиот број интервенции.
-Идејата на Гала вечерта, која е од донаторски карактер, е пред јавноста да го презентираме сè она што досега го сработивме, но и да ги најавиме нашите идни планови, при што од присутните ќе побараме поддршка како и до сега. Донаторската Гала вечер има за цел собирање на финансиски средства за набавка на два АТВ мотори, кои сметаме дека ќе бидат од голема корист за справување со пожари на отворен простори и во шума. Во 2023 година набавивме пратечко возило, автоцистерна, набавка на комби возило за технички интервенции, потоа донација на техничка опрема од Германска амбасада, со која ги збогативме нашите капацитети. Реализиравме и проект „Млади волонтери за сигурна средина за живеење“, со поддршка на УНДП и Општина Кочани, како дел од Reload2 програмата. Преку него обучивме ученици од двете средни училишта за теоретско и практично справување со пожари, истакна Илијев.
На свеченоста беа најавени идните активности што планираат да ги спроведат кочанските доброволни пожарникари.
-Во координација со ТППЕ – Кочани работиме на заедничка програма за имплементација на активност со акцент на младите од основните и средни училишта од општината. Планираме набавка на едно пикап возило, како и реконструкција на општински простор со намена за гаражен простор за потребите на ДПД – Кочани и ТППЕ. Остваривме соработка и со Германската амбасада за почетни активности за изградба на пожарникарски тренинг центар. Веќе отпочнавме и со разговорите со Локалната самоуправа за погодна локација за градба при што ќе следи изработка на проектот и аплицирање до Германската амбасада, а за што се надеваме на позитивен одговор за негова реализација, додаде Илијев.
Првата Гала вечер, Доброволното противпожарно друштво ја реализираше во 2022 година, а по позитивните искуства, ќе продолжи да се органзира и во следните години.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
