Изградбата на пречистителната станица за отпадни води во Кочани се реализира според планираната динамика и сите оперативни објекти се во завршна фаза.
Градилиштето кај кочанското село Мојанци, каде што е лоциран комплексот за пречистување, денеска го посети амбасадорката на Швајцарија, Сибил Сутер Тејада при што на работна средба со тимот швајцарски и локални експерти и претставници на градежните компании беа претставени тековните активности.
На средбата присуствуваше и градоначалникот на Кочани, Николчо Илијев, при што гостите го пренесоа задоволството од тоа како се одвиваат градежните работи.
– Мене ми е драго што сум денеска повторно во Кочани, последната посета беше пред шест месеци. Ме радува што гледам гледам очигледен прогрес на градежните работи на пречистителната станица за отпадни води. Очекуваме градежните работи да завршат до крајот на оваа година, а пуштањето во оперативност, односно во работа да биде во средината на идната година, рече Сибил Сутер Тејада, амбасадорка на Швајцарија.
Паралелно со изградбата на пречистителната станица, во завршна фаза е и примарниот фекален колектор со должина од 12 километри што ќе ја поврзува постојната канализациска мрежа во Кочани и приградската населба Оризари, како и во селата Горни Подлог и Мојанци.
Со реализацијата на проектот дополнителен бенефит ќе има и за комуналното претпријатие „Водовод“ од Кочани, кое ќе стопанисува со станицата за пречистување на отпадни води.
– Задоволни сме од она што го гледаме, задоволни сме од соработката со Министерството за животна средина и просторно планирање и секако од соработката со Општина Кочани. Покрај градежните работи што тука се одвиваат и би требало да бидат завршени до крајот на оваа година, а да се пушти пречистелната станица во работа идното лето, ние работиме на зајакнување на капацитетите на КЈП “Водовод“ за да го зголемиме нивното знаење и да ги подобриме работните практики, за да можат да пружат подобри услуги за своите граѓани, односно услуги со добар квалитет, рече Франсоа Саломе, претставничка на Швајцарскиот секретаријат за економски прашања – СЕКО.
Со Пречистителната станица ќе бидат третирани отпадните води од градот Кочани и од околните рамничарски села, со капацитет од 58 илјади еквивалент жители.
Проектот е со вкупна вредност од 23 милиони швајцарски франци, од кои наjголемиот дел е на Швајцарската агенција за развој и соработка, а 2 милиони евра се од буџетот на Република Македонија.
Т. Ајтовски
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
