Доброволното противпожарно друштво од Кочани в сабота ќе го прослави третиот роденден. По тој повод, по втор пат, ќе организира Меѓународен противпожарен натпревар.
Активностите ќе почнат во 10 часот на три локации во градот. Во прославата ќе бидат вклучени и сите основни училишта од општините Кочани, Зрновци и Чешиново-Облешево.
-Доброволното противпожарно друштво – Кочани во склоп на својот трети роденден го организира вториот Меѓународен натпревар во противпожарни игри. Натпреварот ќе се одржи во централното градско подрачје, на летната сцена позади Центарот за култура „Бели мугри“, Стариот Парк и третиот полигон е во Трговскиот центар, за на крај целиот натпревар да заврши во кругот на Територијалната противпожарна единица – Кочани. На натпреварот имаме пријавено екипи од Србија, Хрватска, Словенија и Бугарија, како и друштва од Македонија. Почетокот е во 10 часот в сабота, 14 септември во Паркот на Револуцијата во Кочани, истакна Златко Илијев, претседател на Доброволното противпожарно друштво – Кочани.
Дел од содржините е и пригодна културно-забавна програма.
-Ќе имаме едно мало катче каде што ќе ги вклучиме и најмалите, односно дечињата од Детската градинка „Павлина Велјанова“ каде тие ќе имаат свој настап по отворањето на игрите, додаде Илијев.
Доброволното противпожарно друштво од Кочани брои околу 50 членови, а беше основано на 15 септември 2021 година како резултат на големиот пожар што на 2 август истата година ја зафати околината на Кочани.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
