Во автентичниот амбиент на ирскиот паб „Гинис“, се одржа февруарското издание на популарниот Паб квиз – Кочани, кој повторно ги собра љубителите на знаењето и добрата забава.
Настанот предизвика голем интерес, исполнувајќи го капацитетот со максимален број од 15 екипи, а покрај домашните натпреварувачи, учество зедоа и гости од Виница и Демир Капија.
Во силна конкуренција, првото место го освои екипата на „Мобилност“, која покажа највисоко ниво на знаење во текот на квизот. Членовите на екипата учествуваат на паб-квизот уште од самиот негов почеток и досега покажуваа солидни знаења, но не успеваа да стигнат до победата.
-Постојано учествуваме, но денеска бевме засилени со двајца помлади членови кои дојдоа од Скопје и имаат повеќе познавања околу прашањата поврзани со современата технологија и музиката. Тоа ни помогна да дојдеме до победата, со вкупно 32 поена од можни 35, истакна Горан Војновски од екипата на „Мобилност“.
Сепак, најголемата неизвесност се појави при одредувањето на второпласираниот тим. Поради изедначен број бодови, се пристапи кон „тај-брејк“ пресметка помеѓу екипите на „Социјални отпадоци “ и „Забрањено пушење“. По дополнителното прашање, второто место ѝ припадна на екипата „Забрањено пушење“, додека на третото место се најдоа победниците од изминатите три квиза по ред – тимот на „Социјални отпадоци “.
За најуспешните учесници на вечерта беа обезбедени и соодветни награди, со што се заокружи уште едно успешно издание на овој културно-забавен настан во Кочани.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
