Изградбата меѓурегионалната депонија, односно на Центарот за управување со отпад за Источниот и Североисточниот регион треба да заврши за околу три години, со што ќе се стави во функција системот за собирање, транспорт и третман на отпадот од 18 општини.
На регионалната средба што денеска во Кочани ја организираше Здружението на даватели на комунални услуги АДКОМ, а на која присуствуваа претставници од комуналните претпријатија и градоначалници од Источниот регион, беше нагласено дека треба да се интензивираат активностите во рамки на проектот „Со подигнување на јавната свест до одржливи комунални услуги“.
На државно ниво двата региона беа најнапред во реализацијата на меѓурегионалниот Центар за управување и третман на отпадот на локација кај светиниколското село Мечкуевци и беа набавени садови за собирање и возила за транспорт на отпадот. Неколку години активностите стагнираа, но од неодамна има раздвижување и поставен е в.д. директор на меѓурегионалното претпријатие кое ќе го води процесот на изградба на Центарот.
-Вчера стручните служби од Општина Кочани беа на состанок во Министерството за финансии каде од канцеларијата на ЕУ беа добиени информации дека целиот процес треба да биде затворен до почетокот на 2027 година. Тоа значи дека во наредниот период треба да се направи брза реализација на регионалната депонија и на претоварните станици за отпад од соседните општини. Во фаза на затворање се помалите депонии што гравитираат околу Кочани, а тоа е скоро завршено со депониите во соседните општини Зрновци и Чешиново-Облешево. Сметам дека сме на добар пат, а на сето ова му треба динамика и „ветер во грб“ за побрзо да оди реализацијата и да се дојде до конечната фаза во која отпадот ќе се носи во регионалниот Центар за управување со отпад, истакна градоначалникот на Кочани, Љупчо Папазов.
Во тек е постапката за изработка на соодветна техничка документација за затворање на постојните депониите, што како процес го раководи Министерството за животна средина и просторно планирање, во соработка со општинските служби за урбанизам и заштита на животната средина.
Според последните податоци со кои располага комуналното претпријатие „Водовод“ од Кочани, службите за одржување на хигиената годишно собираат и транспортираат по околу 60 илјади кубни метри комунален отпад, што сега завршува на постојната општинска депонија кај селото Бели.
Активностите за меѓурегионалниот Центар за управување и третман на отпадот се инвестиција вредна 40 милиони евра што се реализира со средства од фондовите на ЕУ.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
