Жителите на општина Чешиново-Облешево во рамки на денешната завршна сесија од Форумот во заедницата, дадоа поддршка на проектот за изградба и уредување детски забавен парк и обезбедување опрема за негово снабдување со вода.
За реализација на проектот е обезбеден грант од 40 илјади американски долари во рамки на програмата Зајакнување на општинските совети, финансирана од владата на Швајцарија, Програмата за развој на Обединетите нации (УНДП) и Министерството за локална самоуправа.
-На форумската сесија беше избран најпосакуваниот проект од граѓаните на општина Чешиново-Облешево, тоа е изградба на парк со детски реквизити, а во кој што влезе уште еден од проектите – бушотина за вода во истиот тој парк. Така, ќе се направи комплетирање на еден проект што ќе значи добро за граѓаните на целата општина. Овој проект беше поддржан едногласно од сите присутни на форумот и на некој начин го кажаа своето мислење дека ова е една од работите коишто треба во најбрзо време да ги има општина Чешиново-Облешево, истакна Јорданчо Костадинов, комодератор на форумските сесии.
Другите три предлога од областа на инфраструктурата се однесуваа на поставување автобуски постојки во населените места во општината, реконструкција на патниот правец Облешево – Спанчево и уредување детско игралиште во градинката „Ѕвездички“ во Чешиново. Тие имаа скоро изедначен број гласови, но сепак не се квалификуваа за да се реализираат во рамки на овој проект. Како потреби на месното население ќе бидат доставени до општинската администрација која во иднина треба да најде можности за нивно решавање.
Покрај швајцарската финансиска поддршка, во реализацијата на проектот со кофинансирање во висина од 20 отсто ќе учествува и Општина Чешиново-Облешево. Рокот за комплетирање на градежните активности е до септември годинава, по што ќе се одржи завршна форумска сесија на која ќе биде разгледан извештај за реализираниот проект.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
