Во предвидениот рок од околу еден месец заврши реконструкцијата и преасфалтирањето на делницата долга 11 километри на регионалниот пат од Кочани кон туристичко-рекреативниот центар Пониква на Осоговските Планини.
За реализација на градежните работи Министерството за транспорт и врски инвестираше над 102 милиони денари, при што освен нов асфалтен слој на коловозот со широчина од шест метри, се работеше и на поправка на заштитната ограда и на пропустите за атмосферската вода.
Ова е прва фаза од рехабилитацијата на патот кон Пониква, чија вкупна должина изнесува околу 22 километри. Во договор со Јавното претпријатие за државни патишта беше опфатено и преасфалтирање на околу два километри од пристапната улица „Страшо Ербапче“ во Кочани, која всушност е дел од регионалниот пат. За наредната година се планира да се реконструира преостанатата должина од патот, со што ќе се подобри безбедноста и ќе се олесни пристапот до планинскиот туристички центар.
– Патот потполно е направен како нов, во тек се работите околу банкините и сите пропратни работи кои се потребни со цел да биде ставен во функција како што треба и како што им е потребен на посетителите на овој зимско-туристички центар. Понатаму ќе продолжи да се работи на заменување на целокупната ограда околу патот, со цел да добиеме пристапен пат кој ќе биде за потребите на посетителите на Пониква, и за безбедност и во секој друг поглед, рече Николчо Илијев, градоначалник на Општина Кочани.
Со реконструкцијата на првата делница, проширен е постојниот паркинг на Пониква, а прилагоден е и теренот кај месноста Аеродром, со што е обезбеден дополнителен простор за паркирање на уште неколку стотина возила.
©2023 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
