Во основното училишта „Никола Карев“ во Кочани денеска се одржа завршниот настан од едукативната кампања „Бидете херои на чесноста“, што во изминатите десетина месеци ја организираше Државната комисија за спречување на корупцијата (ДКСК).
Кампањата „Бидете херои на чесноста“ е дел од проектот „Активност за антикорупција и интегритет“ што го спроведува Меѓународната фондација за изборни системи (ИФЕС) во Скопје, со финансиска поддршка од УСАИД.
Во обраќањето пред најмладите беше истакнато дека е важно тие да разберат што е корупција и кои се нејзините последици за општеството, а како идни лидери и граѓани на времето што доаѓа да осознаат дека имаат важна улога во борбата против неа.
-Децата треба да развијат вештини како што се критичкото размислување, емпатијата и способноста да препознаваат незаконски или неетички постапки, за во иднина да можат да застанат зад своите права и правата на другите. Затоа, важно е да се поттикне отворена дискусија за случаите на корупција во општеството и да се нагласи важноста од пријавување на неправилности. Ова вклучува охрабрување на децата да контактираат со нивните родители, наставници или властите во случаи на согледана корупција. Децата треба да бидат инспирирани да се вклучат во нивната заедница, да станат активни учесници во антикорупциските активности. Тие можат да учествуваат во кампањи за подигање на свеста, да организираат и поддржуваат иницијативи за промени и да покажат примери на чесно и одговорно однесување, истакна Билјана Ивановска, претседателка на ДКСК.
Нагласувајќи го значењето на кампањата, директорот на ООУ „Никола Карев” од Кочани, Александар Андов истакна дека децата треба да разберат оти корупцијата ги ограничува нивните права и му штети на развојот на нивните заедници.
-Образованието игра клучна улога во оваа борба. Со вклучување на учениците во дискусии, игри и активности за учење, можеме да им помогнеме да развијат критичко размислување и етички вредности. Децата уште од мали треба да ги научат принципите на чесност, праведност и одговорност, истакна Андов.
Од Меѓународната фондација за изборни системи (ИФЕС) во Скопје потенцираа дека секој граѓанин има законска и морална обврска да се бори против корупцијата, што не значи само нејзино препознавање и воздржување од коруптивни дејствија, туку и пријавување случаи на корупција.
За успешноста на кампањата се погрижија и актерите Игор Ангелов и Фисник Зекри, кои на начин близок до учениците ги презентираат лошите страни на корупцијата и добрите страни на одговорноста и чесноста. За сценариото беше задолжена Елеонора Венинова, која на вешт начин на дечињата им ја спојува забавата и едукацијата.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
