Состојбата со палењето и ширењето чад од депонијата кај селото Бели е загрижувачка и постојано ја деградира околината и животната средина, а комуналното претпријатие „Водовод“ е немоќно да се справи и да најде вистинско решение. Такви се заклучоците од расправата на последната седница на Советот на Општина Кочани, на чиј дневен ред се најде и информацијата за состојбата со комуналната депонија.
На седницата на Советот на Советот имаше забелешки за несериозен пристап на раководниот тим и на директорот на комуналното претпријатие во решавањето на ситуацијата.
-Знаејќи ја неговата состојба, не му е грижа за претпријатието, а истиот ни има доставено во извештајот дека јавното претпријатие се наоѓа во незавидна финансиска ситуација и не е во состојба целосно од одговори на новонастанатата состојба со градската депонија. Значи, ние треба да се помириме дека комуналото јавно претпријатие не е во состојба и дека граѓаните на општина Кочани треба да се тррујат дишејќи го чадот од градската депонија, истакна Венко Крстевски, член на Советот на Општина Кочани.
-Проблемот мислам дека делумно е во „Водовод“, односно во раководното лице, бидејќи „рибата од глава смрди“, ама делумно морам да кажам и во органот и којшто го назначил директорот и којшто треба да ги извршува другите странични задачи, коишто очигледно не ги извршува. Така, Кочани е оставено во ситуација да биде регионална депонија, а притоа имаме црно на бело тврдење дека не е во состојба целосно да одговори новонастаната состојба во градската депонија. И што треба сега да чекаме, да се молиме на бога како индијанци кога ќе заврне да го изгасни пожарот, па да подишеме десетина дена. Не ми е јасно значи кој ви е планот со депонијата, не е воопшто смешно, работата е алармантна и ургентна морам да кажам, истакна Жаклина Филипова Свеќаровска, член на Советот на Општина Кочани.
-Под итно градоначалникот, претходниот директор и актуелниот директор да седнат и да најдат начин за решавање на проблемот со градската депонија. Ако проблемот се средства, мислам дека се работи за околу 20-25.000 евра, во првичната постапка мислам дека пред неколку години толку беше набавката, а се покажа успешно третирањето со алги, дајте да пробаме. Ако чекаме и ништо ако не преземеме, ако има некој друг начин, дајте предлог, да најдеме решение, оти летото што ќе ни се донесе, истакна Ивица Лазаров, член на Советот на Општина Кочани.
Во врска со информацијата од „Водовод“ немаше присутен претставник, а образложение даде градоначалникот Љупчо Папазов. Притоа истакна дека се одржал состанок со министерката за животна средина и просторно планирање на кој се разговарало за постапката за изградба на регионалната депонија кај Свети Николе и конечно решавање на проблемот со депонијата кај Кочани.
-Заради дополнителните количини отпад од соседните општини, „Водовод“ не е во можност да се справува и да ги третира, па ќе добиеме поддршка од страна на министерството со избор на соодветен економски оператор кој ќе ја дава услугата за третирање на депонијата. Образложението за тоа зошто не може во овој момент да ја добиеме таа поддршка е дека Министерството, како државен орган, не може да прави измена во планот за јавни набавки, а ветувањето е или возило или економски оператор кој ќе се грижи за депонијата во кочани. Не знам дали ќе биде истата министерка или ќе има нов министер, ќе треба да го повикаме, она што е констатирано во записникот од тој состанок да биде реализирано во периодот после завршувањето на изборниот процес, истакна Папазов.
Во меѓувреме, од „Водовод“ излегоа со јавна информација дека во средата била запалена поголема количина на автомобилски гуми на горната површина од депонијата. Веднаш била алармирана ТППЕ – Кочани која со едно возило и неколку пожарникари го локализирале пожарот, а настанот бил пријавен во полиција.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
