Надоместокот што возачите го плаќаат за паркирање на возилата во централното градско подрачје на Кочани е меѓу најниските во државата, а според предлогот до Советот на Општината, наскоро би можел да поскапи за 100 отсто.
Според одлуката што беше донесена уште во 2014 година, за еден час паркирање на определените паркинг места се плаќаат по 10 денари и оваа тарифа остана непроменета во изминатите скоро 9 години. Покрај плаќањето во готово што го вршат лица наплатувачи, на возачите им беше овозможено надоместокот да го плаќаат и со СМС пораки од мобилен телефон, што чини нешто повеќе поради дополнителната провизија што ја наплаќа операторот.
Со најновата одлука што треба да ја разгледа Советот се предлага измена на членот 3 кој се однесува токму на надоместокот за паркирање, а што треба да гласи:
-за користење на просторот за паркирање на временски ограничените паркинг простори на моторни возила:
– 20 денари од час;
– 100 денари од час за паркирање на товарни моторни возила и автобуси;
– 30 денари од час за паркирање приколки.
Според одлуката од 2014 година за паркирање се плаќа на улицата „Маршал Тито“ по целата должина од мостот кај плоштадот до мостот кај Поштата, како и на улицата „Димитар Влахов“ од пред зградата на Водостопанство „Брегалница“ до спојот со улицата „Коле Неделков“ во Стришани. Исто така, за паркинг ќе се наплаќа и за просторот меѓу зградите на „Стопанска банка“ и водостопанство “Брегалница“. Иако имаше најави и обиди наплатата за паркирање да се прошири и на плоштадот и другите улици во центарот на Кочани, Општината не донесе конечно решение.
Новата предлог одлука за покачување на надоместокот за паркирање ќе се разгледува на седницата на Советот на Општината што е закажана за 27 септември.
Иако се очекуваше дека со плаќањето за паркирање ќе се стави некаков ред во хаосот во сообраќајот, тоа не се случи. Дел од улиците кои се во централното градско подрачје, а за кои не се плаќа паркинг, станаа претрупани со возила.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
