Со сериозни проблеми при дистрибуцијата на водата во каналската мрежа и полнењето на оризовите ниви се соочуваат вработените во водостопанската подружница „Брегалница“ поради неодговорните и деструктивни постапки на одделни земјоделци. Тие сè уште не ја завршиле подготовката на своите површини за сеидба на оризот, иако соседните ниви веќе се наполнети и посеани.
Поради тоа водата не може рамномерно и соодветно да се распределува, а загрозени од предвремено полнење и поплавување се ниви кои, според планот, вода треба да добијат во почетокот на мај.
Од подружницата велат дека оризопроизводителите од атарите на селата Јакимово и Оризари го почитуваат договорениот план за полнење на нивите и за сеидба, но проблемот се јавува со земјоделци од атарите на Кочани и Грдовци. Тие не ја прифаќаат водата со образложение дека доцнат со подготовката на површините поради неповолните временски услови.
По санирањето на штетата предизвикана со намерното сечење на гумената брана кај Грдовци, водата била пуштена во каналите, но некои земјоделци не ја прифатиле и таа направила штета со поплавување на ниви што не се подготвени за сеидба. Во атарите на другите села наводнувањето ќе почне по првомајските пазници, но и таму ќе има проблеми со оглед што оризопроизводителите не можат да се договорат за датумот кога да почнат со полнење на нивите. Тоа главно се однесува на земјоделците од Чешиново кои водата треба да ја очекуваат од Соколарци, Спанчево и Чифлик.
Во водостопанската подружница „Брегалница“ се соочуваат и со намерно оштетување на каналската мрежа, на металните врати на испустите, што заедно со недоволниот број вработени, опрема и механизација, ја усложнува работата и нормално спроведување на годишниот план за наводнување. Покрај повеќекратното намерно сечење на гумената брана, за само една недела на три пати е регистрирано оштетување на опремата и кражби на гориво од градежната машина со која се чистат каналите. Од подружницата упатуваат апел до водокорисните да ги почитуваат договорите за полнење на нивите и да не фрлаат отпадоци и шут во каналите за наводнување.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
