Претседателот на Советот на Општина Кочани, Лазо Митев со писмено соопштение ја информира јавноста дека ги повикува координаторите на советничките групи на координативен состанок. Целта е да се договори натамошното функционирање на Советот по случувањата на последната седница, поради што истата беше прекината.
-Во контекст на последните настани и инцидентот што се случи на последната седница на Советот, во кој советникот Аки Акиов изврши насилство и физички напад врз вработена, како Претседател на Советот чувствувам должност да реагирам соодветно и одговорно.
Советот е демократско тело избрано од граѓаните, а неговата работа мора да биде во служба на јавниот интерес, во духот на почит, дијалог и законитост. Насилството не само што е неприфатливо, туку е и директен удар врз интегритетот на институциите и довербата на граѓаните во нив.
Во таа насока, ги повикувам координаторите на советничките групи на итна координација, со цел да се стави јавниот интерес на прво место и да се обезбеди нормално и безбедно продолжување на седницата, да се постигне согласност околу процедурите што ќе гарантираат достоинствено однесување во иднина и да се постави јасен институционален став кон вакви недозволиви постапки.
Ги повикувам сите политички субјекти да дејствуваат одговорно и да ја стават стабилноста на Советот и доброто на граѓаните пред партиските интереси. Советникот вршител на должноста градоначалник е повикан на координацијата.
Граѓаните очекуваат решенија, а не конфликти. Очекуваат зрелост, а не омраза.
Секој обид за одбегнување на институционален дијалог или релативизирање на насилството ќе биде третирано како обид за попречување на работата на Советот.
Состанокот за координација ќе се одржи на 09.07.2025 среда во 12 часот во салата за состаноци во Општина Кочани, а јавноста ќе биде информирана за заклучоците – стои во писменото известување до јавноста што го упати Митев.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
