Кикбоксерот Лука Змејковски, член на КБК „Лидер“ од Виница, го доби признанието за најдобар млад спортист во општината за 2023 година, со што по втор пат се најде меѓу најуспешните поединци во спортот. Во сениорска конкуренција за најдобар е прогласен фудбалерот Марио Крстовски, чиј матичен клуб е ФК „Слога 1934“.
Минатата година Змејковски го освои првото место на Балканскиот кикбокс куп, беше второпласиран на Европското првенство во ВАКО кикбокс, а на Државното првенство го освои бронзениот медал. Крстевски пак, е еден од најталентираните винички фудбалери и како признание за тоа веќе настапува за фудбалска екипа во Република Словенија.
На манифестацијата „Спортски асови“ што ја организираше Општина Виница, беа доделени награди и признанија за спортистите и екипите во неколку категории, а во образложението беше речено дека целта е да се поттикнат младите да спортуваат и да постигнуваат високи резултати.
-Општина Виница отсекогаш имала добри спортисти, кои низ времето оставиле трајни вредности, за што сме посебно горди. И денес имаме спортисти кои постигнуваат значајни резултати и се вистински промотори на општината во државата и странство. Особено радува фактот што голем број млади активно се занимаваат со спорт, почнувајќи од училишните спортски екипи, па сè до клубовите кои се натпреваруваат во домашните првенства и на меѓународни натпревари. Општината и понатаму ќе ги поддржува во нивните настапи според програмите за работа, но за да постигнат уште подобри резултати добредојдена ќе биде и поддршката од бизнис секторот, истакна Миле Петков, градоначалник на Виница.
Наградата за најдобар тренер му припадна на Дарко Гоцевски од кикбокс клубот „Лидер“, а Ангел Дамјанов од ФК „Слога“ е избран за спортски работник за минатата година. Признание за најдобар спортски рекреативец му беше доделена на велосипедистот ветеран Ванчо Коцев.
Младинската фудбалска школа на ФК „Слога 1934“ е избрана за најдобра во категоријата спортски екипи, а признанија за постигнати високи резултати и промовирање на општината во областа на спортот добија младите спортисти Анастасиј Гоцевски, Нина Колева, Анастасија Андонова, Александар Веселинов и Борис Митревски.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
