Клубот за реален аикидо „Нико“ од Кочани отвори секција со нови членови во ОУ „Малина Попиванова“, со што го проширува опфатот на своите активности.
Секцијата ќе го носи називот „Аико“, а на првиот тренинг што се одржа во училишната спортска сала, дојдоа триесетина вљубеници во благородната боречка вештина од различна возраст, но доминираа најмладите.
Од клубот очекуваат бројот на членови да се зголеми во наредниот период, со оглед што сè уште младите не се запознаени со можностите за спортување што им се нудат.
-Благодарение на Агенцијата за млади и спорт и Аикидо федерацијата на Македонија, со голема поддршка од нејзиниот претседател Ѓуро Илиќ, се прошируваме во источниот регион. Ја отвораме оваа секција во училиштето во Кочани, а идејата е понатаму да одиме и во Виница и околните општини. Кочани има голем потенцијал во спортот воопшто, па и во боречките вештини, како што се каратето и борењето, имаме голема соработка со сите клубови и целта на сите нас е да ги оттгрнеме најмладите од пред мобилните телефони и да ги натераме да спортуваат. Се надеваме дека наскоро ќе ја реализираме идејата и во другите општини, истакна Николчо Гоцев од Клубот за реално аикидо „Нико“.
Аикидото во Кочани има скоро десетгодишна историја, колку што и активно работи клубот. Освен во училиштето „Малина Попиванова“, претходно беа отворени секции и во Оризари, Облешево и Зрновци. Во овој период низ клубот поминаа голем број млади кои ги изучуваа тајните на благородната вештина. Освен тоа, девет членови се стекнаа со мајсторска титула и подготвени се самостојно да одржуваат тренинзи, односно да формираат свој клуб.
Од КРА „Нико“ упатија повик до сите заинтересирани да се зачленат и да почнат со редовните тренинзи што се изведуваат во салата на ОУ „Никола Карев“.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
