Во просториите на ЈОУБ „Искра“ беше промовирана книгата „Книжевни портрети и рецензии“ од роднокрајната авторка Славица Цветкова. Ова е нејзина тринаесетта самостојна книга, а трета која излезе годинава, а покрај сите нив Цветкова е и коавторка уште на пет други книги.
Директорката на библиотеката „Искра“ Кристина Ѓоргиевска Атанасова истакна дека промоцијата и на оваа книга е дел од програмата за 32. издание на манифестацијата „Денови на кочанскиот ориз“.
-Библиотеката секогаш со радост ги прифаќа промоциите на делата изработени од страна на роднокрајните автори. Авторите се потрудиле со нивниот збор да остават вечна трага во книгите издадени за време на оваа манифестација. Во претходните три дена имавме уште три промоции на книги од роднокрајни автори, истака Кристина Ѓоргиевска Атанасова директорка на библиотека „Искра“.
-Книгата е составена од три дела. Првиот се однесува на книжевни портрети на роднокрајни автори кои се изработени во проектот „Поезијата повод и причина“, што се реализираше пред почетокот на ковид-пандемијата. Во вториот дел поместени се тринаесет рецензии на книги на роднокрајни автори и осврти на словенечки автори. Третиот дел е библиографија на моите дела како книжевник, но и новинар, а книгата ја напишав заради тоа идните генерации да имаат увид во тоа кој творел во Кочани, истакна Славица Цветкова, авторка на книгата.
Промотори и резензенти беа Габриела Стефановска и Иван Котев.
Во склоп на промоцијата настап имаа и учениците од музичкото училиште „Ристо Јуруков“. Ова е последна промоција на книга во рамки на манифестацијата „Денови на кочанскиот ориз 2023“.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
