Во Венчалната сала на Општина Кочани вечерва се одржа комеморативна седница по повод прераната смрт на 62-годишниот Миле Андонов, поранешен пратеник од СДСМ. На седницата присуствуваа членови на Општинската организација на СДСМ – Кочани, како и неговите најблиски.
Настанот почна со едноминутно молчење, а потоа свое обраќање пред присутните имаа Душанка Горгиева Трпевски и Љубомир Јанев, изнесувајќи сеќавања за ликот и делото на Андонов.
-Неговиот општестевен ангажман произлегуваше од неговиот немирен дух и постојаната потрага по најдоброто. Како член на СДСМ влијаеше во општеството во кое живееше. Беше член на Советот на Општина Кочани, а од 2008 до 2016 година во три скратени манадати беше пратеник во Собранието и активен во Буџетскиот совет, член на Комисијата за финасирање и буџет и на Комисијата за земјоделство, шумарство и водостопантство. Беше страдалник и во немилите настани во 2014 година што се случија во Сообранието. Животот и неговата принципиелност и одговорност го изградија како човек со значајно општестевно, политичко и партиско искуство. Вечна му слава, истакна Душанка Горгиева Трпевски.
-Генерациски и сопартиски пријател и соработник во Собветот на Општина Кочани. Растевме во исто време, уживавме во средношколските денови, посветено бевме вклучени во партиските активности за обезбедување прогрес на општината и подобар живот на нашите сограѓани. Со неговата работа во општинскиот совет ми беше непроценлива помош во работата како градоначалник. Миле беше и ќе остане народен човек, а ваквата декларација е најголемото признание во средината во која што живееше. Во професијата беше успешен и признаен економист, приватен сопственик во повеќе дејности, а тоа го покажуваше неговиот храбар карактер, рече Љубомир Јанев.
Присутните имаа можност и да остават своја порака во книгата на жалоста која потоа ќе биде предадена на семејството Андонови.
Миле Андонов е роден на 10 август 1962 година во Кочани, а почина на 22 јуни годинава. Смртта настана по пад од кровот на неговата викендичка на Пониква.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
